अभिनेता रणवीर सिंहले हालै बलिउड र दक्षिण भारतीय फिल्मका बीच चलिरहेको बहसमा आफ्नो प्रतिक्रिया दिएका छन्।
निर्देशक तथा अभिनेता किच्चा सुदीपले हिन्दी भाषा सबै भारतीयको मूल भाषा होइन, भारतीयहरू अरू भाषा पनि बोल्छन् र ती पनि प्रमुख भाषा हुन् भन्ने अभिव्यक्ति दिएपछि यो बहस सुरू भएको थियो। यसमा अभिनेता अजय देवगनले जवाफ दिएपछि यो विषयले खुब चर्चा पाएको थियो।
अजयले सुदीपको ट्विटमा जवाफ लेख्दै 'हिन्दी भाषा सबैको होइन भने किन दक्षिण भारतीय फिल्महरू हिन्दीमा डब गरिन्छन्' भन्ने आसयको भनाइ राखेका थिए। उनले भारतीयहरूको मूल भाषा हिन्दी नै भएको मत राखेका थिए।
यी दुई अभिनेताबाट सुरू भएको बहसले लामै चर्चा पाएको थियो। पछि दुवै अभिनेताले एकअर्काको धारणालाई सम्मान गर्ने आसयको अभिव्यक्ति दिएका थिए।
यसैबीच रणवीर सिंहले पनि यसमा आफ्नो प्रतिक्रिया दिएका हुन्।
रणवीरले भनेका छन्- भारतीय सिनेमा एउटै हो।
बलिउड लाइफलाई अन्तर्वार्ता दिँदै उनले यो विषयमा भने, 'म एक कलाकार हुँ र मलाई फिल्मको व्यापारबारे धेरै जानकारी छैन। न म निर्माता हुँ न फिल्म वितरक। म त एक व्यावसायिक कलाकार मात्र हुँ। मैले क्यामराका सामु मेरो कला देखाएको पैसा पाउँछु। मेरो बुझाइ यसमै सीमित छ। त्यसैले मेरो हिसाबमा फिल्म जस्तो सुकै हुन् राम्रा हुन्छन्।'
रणवीरले भारतीय सिनेमामा भाषाको आधारमा भइरहेको बहसबारे थप भनेका छन्, 'मैले पुष्पा र आरआरआर हेरेँ। मलाई उनीहरूको मूल भाषा आउँदैन। तर म यी फिल्म र यसमा भएका काम देखेर चकित खाएँ। म यत्ति भन्न सक्छु म मात्र कामलाई बढावा दिन्छु। जुन यी दुई फिल्ममा शानदार तरिकाले गरिएको छ। मलाई दक्षिण भारतीय फिल्मले यति राम्रो काम गरिरहेकोमा गर्व लाग्छ। मलाई साँच्चै गर्व छ र उनीहरू सबै आफ्नै हुन् यार। सबै भारतीय सिनेमा एक हुन्।'
कामको कुरा गर्दा रणवीर सिंह नयाँ फिल्म 'जयेशभाइ जोरदार' मा देखिँदै छन्। उनी हाल फिल्मको प्रचारमा खुब व्यस्त छन्। कमेडी ड्रामा फिल्म जयेशभाइ जोरदार आउँदो मे १३ मा रिलिज हुँदैछ। यो फिल्मको ट्रेलर दर्शकहरूले निकै रूचाएका छन्।
