बलिउड अभिनेत्री सोनम कपुर आमा बन्ने भएकी छन्। सोनमले आफ्नो इन्स्टाग्राममार्फत् आफू आमा बन्न लागेको खबर सार्वजनिक गरेकी हुन्।
उनले आफ्ना श्रीमान आनन्द अहुजासँग फोटो राखेकी छन्।
आफ्नो पेटमा हात राख्दै उनले लेखेकी छन्, 'हाम्रा चार हातहरू सकेसम्म राम्रो तरिकामा तिमीलाई हुर्काउन सफल होऊन्। हाम्रा दुई मुटुको धड्कन एक भएर अब तिम्रो मुटुमा धड्किँदैछ। तिमीलाई माया र समर्थन गर्ने एक परिवार। हामी तिमीलाई स्वागत गर्न व्यग्र छौं।'
सोनमको यो पोस्टमा थुप्रै सेलेब्रेटी र प्रशंसकहरूले बधाइ र शुभकामना दिएका छन्।
सोनम कपुर र आनन्द अहुजाले सन् २०१८ मेमा बिहे गरेका हुन्। सोनम अभिनेता अनिल कपुरकी जेठी सन्तान हुन्।
आनन्द र सोनम अहिले लन्डनस्थित घरमा बस्छन्।
कामको कुरा गर्दा सोनम पछिल्लो समय सन् २०१९ मा रिलिज भएको 'द जोया फ्याक्टर' मा देखिएकी थिइन्।
त्यस्तै अनिल कपुर र अनुराग कश्यपको नेटफ्लिक्स फिल्म 'एके भर्सेर एके' मा उनी क्यामियो भूमिकामा देखिएकी थिइन्।
