चर्चित भारतीय निर्देशक राम गोपाल बर्माले निर्देशन र निर्माण पछि अभिनयमा हात हाल्ने तय भएको छ।
उनी ‘कोबरा’ सिनेमाबाट अभिनयमा डेब्यू हुन लागेका हुन्। सिनेमालाई उनले अगस्त्य मंजुसँग मिलेर सह-निर्देशन पनि गर्नेछन्। आइतबार आफ्नो ५७ औं जन्मदिनको अवसरमा ट्वीटरबाट उनले सिनेमाको घोषणा गरेका हुन्।
‘आज मेरो जन्मदिनको अवसरमा पहिलोपटक अभिनेता बन्न लागेको घोषणा गर्दछु। यदि तपाईहरूले मलाई आशिर्वाद दिनुभएन भने मलाई नराम्रो लाग्नेछैन्। धन्यवाद’, ट्वीटमा बर्माले लेखेका छन्।
उनले सिनेमाको फस्टलुक पोस्टर पनि सार्वजनिक गरेका छन्। सार्वजनिक गरिएको पोस्टरका अनुसार सिनेमा आजसम्मको सबैभन्दा खतरनाक अपराधीको जीवनीमा आधारित हुनेछ।
‘यदि ऊ गिरफ्तार भयो भने पुलिस विभागका आधा पुलिस जेलमा हालिनेछन्’, सार्वजनिक पोस्टरमा भनिएको छ।
सिनेमामा बर्मा एक जासुस प्रहरी अधिकारीको भूमिकाम देखिनेछन्। अभिनयमा डेब्यू गर्न लागेका बर्मालाई अमिताभ बच्चनले शुभकामना दिदैं सफलताको कामना गरेका छन्।
सिनेमाबाट नयाँ अभिनेता केजीले डेब्यू गर्ने पनि बर्माले आफ्नो ट्वीटरमा जनाएका छन्।
