कमेडियन कपिल शर्मा र सुनील ग्रोवरबीच गत वर्ष झगडा भएपछि उनीहरूको जोडी छुट्टिएको थियो। कपिल शोमा डाक्टर मसहुर गुलाटीको भूमिकामा हँसाइरहेका सुनीललाई कपिलले जहाजमा दुर्व्यवहार गरे। यो विवाद बढ्दै गएपछि सुनीलले शो छाडे। उनीसँगै अरू कलाकार पनि गए। उनीहरूबिनै केही समयसम्म कार्यक्रम चल्यो। तर शो फ्लप हुँदै गयो। अन्त्यमा बन्दै भयो।
यो घटनाको झन्डै एक वर्षपछि गत डिसेम्बरबाट कपिल शो फेरि सुरू भयो। सुनीलले कलर्समा अर्को शो चलाए। सुनीलको शोले खास चर्चा कमाएन। कपिल शोले भने टिआरपी चार्टमा आफ्नो स्थान बनाउन सफल भएको छ।
सोनी च्यानलमा आइरहेको कपिल शोकाको निर्माता सलमान खानको कम्पनी हो। अब सलमानले सुनील ग्रोवरलाई पनि कपिल शोमा ल्याउने भएका छन्। बलिउड हंगामाका अनुसार सलमानले सुनीललाई कपिल शोमा कमेडी गराउन भने ल्याउन लागेका होइनन्। वास्तवमा सुनील आफ्नो आउँदो फिल्मको प्रचार गर्न आउने भएका हुन्।
सलमानको नयाँ फिल्म 'भारत' सुनीलले सलमानका साथीको भूमिका खेलेका छन्। यो फिल्म जून महिनामा रिलिज हुनेछ। यही फिल्मको प्रचारका लागि कट्रिना कैफका साथमा सलमान र सुनील कपिल शोमा आउन सक्ने बलिउड हंगामाले लेखेको छ।
आफूले प्रस्तुति दिएर हँसाइरहेको शोमा सुनील अब पाहुना बनेर आउन सक्नेछन्। उनीहरू शोमा आएको भाग कहिले प्रसारण हुन्छ भन्ने यकिन छैन। तै यो खबरले सुनील र कपिललाई एकसाथ देख्न चाहने फ्यानहरू उत्साहित छन्।
केही दिनयता कपिल शोमा नवजोत सिंह सिद्धूका कारण हलचल भइरहेको छ। पुलवामा आतंकी हमलाबारे दिएका टिप्पणीका कारण सिद्धूको व्यापक विरोध भयो। यसको असर कपिल शोमा पनि पर्यो। सिद्धूलाई शोबाट ननिकाले शो हेर्नै बन्द गर्ने धम्की फ्यानहरूले दिए। उनलाई निकाल्नु पर्ने माग हुन थालेपछि आखिरमा उनी शोबाट बाहिरिए। उनको ठाउँमा अर्चना पूरन सिंह आइन्। आउँदो शोदेखि सिद्धूको स्थानमा अर्चना हुनेछिन्।
कपिलले सिद्धूलाई शोबाट निकाल्नु गलत भएको बताएपछि फ्यानहरू उनीसँग पनि रिसाएका देखिन्छन्। कपिललाई हटाउने माग ट्विटरमा छाइसकेको छ। यसले कुन बाटो लिन्छ भन्ने यकिन छैन।
सलमान खानले आफ्नो शो जोगाइराख्न केही उपाय भन्ने पक्कै लगाउलान्! सुनीलको आगमनले केही हलचल पक्कै मच्चिएला!