बलिउड अभिनेता रणवीर सिंह आजभोलि सफलताको शिखरमा छन्। उनका पछिल्ला फिल्मले करोडौं कमाउन सफल भएका छन् भने उनको अभिनयको पनि वाहीवाही भइरहेको छ।
पद्मावत, सिम्बा र गली ब्वाइ गरी तीन वटा लगातार हिट फिल्म दिएका रणवीरले अब बलिउडका अग्रज कलाकारको पदचाप पछ्याउने भएका छन्। आमिर खान, सलमान खान र अक्षयकुमार लगायत अरू दिग्गज कलाकार झैं रणवीरले पनि आफ्नो फिल्मबाट पारिश्रमिक नलिने निर्णय गरेका छन्।
भारतीय सञ्चारमाध्यमहरूका अनुसार रणवीरले अब फिल्मबाट पारिश्रमिकको साटो 'नाफा' लिने बताएका छन्। अर्थात् फिल्मले कमाएको नाफाको निश्चित प्रतिशत। रणवीरको नयाँ फिल्म '८३' आउँदैछ। कबिर खानद्वारा निर्देशित यो फिल्ममा रणवीरले क्रिकेटर कपिल देवको भूमिका निर्वाह गरेका छन्। र, फिल्ममा कपिल देवको कप्तानीमा भारतले पहिलोपटक विश्वकप जितेको समयका बारेमा छ।
रणवीरले यो फिल्मको पनि पारिश्रमिक नलिई नाफा लिने बताइएको छ। सफलता बढेसँगै रणवीरको 'ब्रान्ड भ्यालू' बढिरहेको छ। उनको बढ्दो उचाइ र प्रभाव देखेर निर्माताहरूले पनि उनलाई नाफा हिस्सा दिन आनाकानी नगरेको सञ्चारमाध्यमहरूले लेखेका छन्। उनले कति प्रतिशत हिस्सा लिन्छन् भन्नेबारे जानकारी छैन।
रणवीर अब सुपरस्टार भइसके। लगातार आएका ब्लकबस्टर फिल्मको कमाइ रेकर्डबाटै थाहा हुन्छ उनको सफलता। पद्मावतपछि रणवीरको पारिश्रमिक ह्वात्तै बढेको छ। यस्तो अवस्थामा निर्माता-निर्देशकले रणवीरलाई पारिश्रमिकको साटो नाफा बाँड्न सहज मान्ने बताइएको छ।
'ब्यान्ड, बाजा, बारात' फिल्मबाट करिअर सुरूआत गरेका रणवीरले ८ वर्षमै ठूलो सफलता पाइसकेका छन्।