भारतको तमिल सिनेमाका निर्विकल्प सुपरस्टारका रूपमा परिचित रजनीकान्त र बलिउड अभिनेता अक्षय कुमार स्टारर '२.०' को रिलिज मिति नजिकिदैं गर्दा दर्शकहरूमा सिनेमालाई लिएर व्यग्रता बढेको बढ्यै छ। रजनीका प्रशंसकहरूको संख्या र उनीहरूले सिनेमाप्रति देखाउने पागलपन (विशेषगरी दक्षिण भारतमा)ले यसपटक पनि वक्सअफिसमा आगो बाल्ने अनुमान गरिएको छ र त्यसका संकेतहरू देखिन थालिसकेको छ।
हाइपका कारण यस सिनेमाका वितरकहरूले पैसा कमाउनका लागि कुनै कसर बाँकी नराख्ने लक्षण देखाउन सुरू गरिसकेका छन्। बलिउडको सिनेमा सम्बन्धि चर्चित वेवसाइट 'कोइमोइ डटकम'ले सिनेमाको सो बिहान साढे चारबजे देखि लगाउने तयारीमा प्रदर्शकहरू रहेको जनाएको छ। तिरूछिरापल्लीका (तिर्छी) प्रदर्शकहरूले विभिन्न पर्दामा बिहान सबेरै साढे चारबजेदेखि राती ९ बजेसम्ममा २० बढि शोहरू निकाल्ने प्रयास गरिरहेको समाचार प्रकाशित गरेको छ।
तिर्छी तमिलनाडुको चौथो घना जनसंख्या भएको शहर हो।
यस सिनेमाका लागि यो क्रेज तमिलनाडुमा मात्र नभएर युएईमा पनि देखिएको छ। युएईको भिओएक्स सिनेमाज्ले आफ्नो चेनमा सय बढी शो दिने तयारी गरेको छ, जुन उसको चेनमा आजसम्म कुनै पनि सिनेमालाई दिइएको सर्वाधिक शो संख्या हो।
'२.०' आजसम्म निर्माण गरिएको सर्वाधिक महँगो भारतिय सिनेमा हो। सिनेमाको बजेट करिब ५४३ करोड भारू रहेको बताइन्छ। सिनेमा डबसहित करिब १४ भाषामा एकसाथ रिलिज हुँदैछ। सिनेमालाई एस शंकरले निर्देशन गरेका हुन्।
रजनीसँग उनले यसअघि दुई सिनेमामा काम गरिसकेका छन् जुन वक्सअफिसमा सुपरहिट सावित भएका थिए र यसपटकको तेश्रो सहकार्यले वक्सअफिसमा सहजै ह्याट्रिक गर्ने अनुमान गरिएको छ।
सिनेमा २९ नोभेम्बरमा रिलिज हुँदैछ।
