डिसेम्बर २१ मा रिलिज हुने शाहरूख खानको 'जिरो'को कारण बलिउड त्यस सिनेमाले गर्ने सम्भावित व्यापारलाई लिएर उत्साहित रहेको छ।
अंग्रेजी नयाँ वर्ष तथा क्रिसमसको पूर्वसन्ध्यामा रिलिज हुने सिनेमामा शाहरुख खान एक कम उचाइ भएका बौना सिंह नामक पात्रको भूमिकामा देखिदैछन्।
ट्रेलरले एउटा कीर्तिमान बनाइसकेको छ तर सो रिलिज मिति उनका लागि सहज नहुने देखिएको छ र कारण हो दक्षिण भारतको कन्नड भाषाको 'केजिएफ' सिनेमा। सो सिनेमा पनि शाहरूखको 'जिरो'सँगै रिलिज हुँदैछ। दुई भागमा बनेको सिनेमा एकसाथ पाँच भाषामा रिलिज हुँदैछ।
कन्नड भाषामा बनेको सर्वाधिक बजेटवाला सिनेमाको ट्रेलर पनि दर्शकमाझ सर्वाधिक लोकप्रिय भइसकेको छ जसका कारण सिनेमाले राम्रो व्यापार गर्ने र शाहरूखलाई टक्कर दिने अनुमान छ।
हिन्दीमा बलिउडका चर्चित निर्देशक फरहान अख्तर तथा निर्माता रितेष सिध्वानीले वितरण गर्ने सिनेमा भएकाले हिन्दीभाषी दर्शकमाझ सिनेमाको क्रेज बढेको भारतिय संचारमाध्यमहरू बताउँदै आएका छन्।
रिलिजयता सिनेमाको हिन्दी ट्रेलरलाई मात्र १३ मिलियन पटक हेरिसकिएको छ। ट्रेलर हेर्ने अधिकाशंले आफूहरू उत्साहित भएको र सिनेमाको प्रतिक्षा गरिरहेको प्रतिक्रिया जनाएका छन्।
'केजिएफ' सिनेमाको पूरा नाम 'केजिएफ" कोलार गोल्ड फिल्ड' हो। सिनेमाले मुम्बईको सन् ७० र ८० को दशकको सुन खानीको परिदृश्यमा 'रक्की' नामक पात्रको केन्द्रमा कथा भनेको छ।
सिनेमालाई प्रशान्त निलले निर्देशन गरेका हुन्। शाहरूखका लागि यो सिनेमा एउटा खतरा हुनुमा यसलाई 'बाहुबली'सँग तुलना गरिनु एउटा हो भने निर्देशक अर्का कारण हुन्। सन् २०१४ मा डेब्यू सिनेमा 'उग्रम'बाट उनले बक्सअफिसमा आँधि ल्यादिएका थिए। समिक्षकले उनको आलोचना नै गरेनन।
सो सिनेमालाई सन् २०१४ सम्म बनेका कन्नड भाषाका सिनेमामध्येको सर्वोत्कृष्ट सिनेमा समेत भनियो।
'केजिएफ' बनाउन पनि ठूलो समय र मेहेनत लगाइएकाले पनि सिनेमालाई लिएर कौतुहलता छ। सिनेमा बनाउन करिब हजार दिन खर्च भएको छ। सुटिङमा करिब २०० दिन लागेको थियो भने बाँकी समय सिनेमाको तयारी र पोस्टप्रोडक्सनमा खर्च भएको बताइन्छ।
यस सिनेमा सो मितिमा रिलिज हुने अन्य सिनेमाका लागि टक्करको हुने कुरा सिनेमाका मूख्य अभिनेता यशको भनाइबाट अनुमान लाउन सकिन्छ। उनले आफ्नो सिनेमाको तुलना भारतिय सिनेमासँग नभइ हलिउड सिनेमासँग हुने बताइसकेका छन्।
पछिल्लो समय भारतका क्षेत्रिय सिनेमाहरूले आफ्नो मेकिङमा भब्यतालाई बढाइरहेका छन् र लागत बजेट बलिउडसरह हुन थालिसकेको छ। हिन्दी संस्करणको रिलिज केहि करोडको कमाइमा थन्किने गरेकोमा पछिल्लो समय बलिउडले मानक मान्ने गरेको सय करोड भारूको कमाइलाई उनीहरूले पार गर्न थालिसकेका छन्।
यस्तोमा 'केजिएफ'ले नयाँ स्तर निर्धारण गर्ने अपेक्षा गरिएको छ।