रिलिज अगाडि ठूलै कमाइ गर्ने अनुमान गरिएको आमिर खान तथा अमिताभ बच्चन अभिनित 'ठग्स अफ हिन्दोस्तान'को कमाइ रिलिजको ९ औं दिनमा दयनीय बनेको छ।
रिलिजको पहिलो दिन ५० करोड भारूको कीर्तिमानी कमाइ गरेको सिनेमाले ९ औं दिनमा १ करोड २५ लाख भारू मात्र कमाइ गरेपछि यस्तो भएको हो।
विजय किरण आचार्य निर्देशित सिनेमाले भारतीय वक्सअफिसमा ९ दिनमा १ सय ४१ करोड भारू मात्र कमाउन सकेको छ। ३०० करोड भारूको लागतमा निर्माण भएको सिनेमाको यस्तो कमाइले सिनेमा फ्लपको सूचीमा परिसकेको भारतीय संचारमाध्यमले जनाएका छन्। सिनेमाले दर्शक तथा समिक्षक दुबैबाट आलोचना मात्र खेपेको छ।
रिलिज लगत्तै 'झुर' सिनेमा भनेर अत्यधिक आलोचित बनेको सिनेमा भारतीय वक्सअफिसमा पहिलो दिन कीर्तिमानी देखिएपनि दोश्रो दिनबाट निरन्तर ओरालो लागिरहेको छ। पहिलो दिन ५० करोड कमाएको सिनेमाले दोश्रो दिन २८.२५ भारू मात्र कमायो। तेश्रो दिनसम्म २२ करोडमा खुम्चिएको थियो। दिपावली बिदामा गतिलो कमाइ गर्ने ठानिएको सिनेमाको कमाइ त्यसयता ओरालो लागिरहेको छ।
सिनेमाले डायस्पोरामा पनि गतिलो कमाइ गर्न सकेन। उसले विदेश रिलिजबाट जम्मा ५६ करोड मात्र कमाउन सक्यो।
