आमिर खानको नयाँ सिनेमा रिलिजपुर्व ठूलो आकर्षण दर्शकमा रहने गर्छ। पछिल्लो समय उनले अभिनय गरेका 'दंगल', 'पिके', 'थ्री इडियट्स' जस्ता सिनेमाका लागि उनले दर्शक र समिक्षकबाट तारिफ बटुले।
उनी अभिनित पछिल्लो सिनेमा 'ठग्स अफ हिन्दोस्तान'को यसै साता रिलिज हुँदैछ। यसअघिका सिनेमाको ट्रेलर रिलिज हुँदादेखि नै आमिरले तारिफ पाउन सुरू गर्थे तर यसपटक भने उनको आलोचना पनि भएको छ। उनी विशेषगरी ट्वीटर प्रयोगकर्ताको निशानामा परेका छन्।
'हिन्दुस्तान टाइम्स'को अनलाइन संस्करणमा प्रकाशित समाचारका अनुसार सिनेमाले हलिउड ब्लकबस्टर सिनेमा फ्रान्चाइज 'पाइरेट्स अफ दि क्यारेवियन'बाट नक्कल गरेको भन्दै ट्विटरमा आलोचना र मजाक उडाउने काम भइरहेको छ।
यसरी आलोचना सुरू भएपछि सिनेमाका प्रोडक्सन डिजाइनरे आफ्नो सिनेमा नक्कल नभएको र आफूले 'पाइरेट्स अफ दि क्यारिवियन' समेत नहेरेको भन्दै बचाउ गरिरहेका छन्।
'यो मेरो दिमागमा कहिल्यै आएन। हाम्रो जीवन धेरै सरल छ, हामीलाई त्यो समय थाहा छ र त्यो जहाजका बारेमा पनि। त्यो त हामीलाई ज्ञात भएको कुरा हो। त्यस्ता जहाजहरू अझै चलिरहेका छन्। त्यस कारण... मैले ती सिनेमाबाट केही सापटी लिएको छैन्', सिनेमाका प्रोडक्सन डिजाइनर सुमित बासुले भने।
यस कुराको बचाउ स्वयम् आमिरले पनि गरेका छन्।
'त्यस्ता सयौं एक्सन एड्भेन्चर सिनेमा छन्। पाइरेट्स अफ क्यारेवियन छ, इन्डियाना जोन्स र अरू धेरै छन्। यी सबै एक्सन एडभेन्चर सिनेमा हुन्। हाम्रो पनि त्यही हो तर कथा फरक छ। मेरो चरित्रसमेत अरू कुने चरित्रको जस्तो छैन,' एक अन्तर्वार्तामा आमिरले प्रष्टिकरण दिँदै भनेका छन्।
आमिर र प्रोडक्सन डिजाइनरले यस्तो प्रष्टिकरण दिएपनि ट्वीटर प्रयोगकर्ताहरू यो मान्न तयार छैनन्। उनीहरूले सिनेमाको ट्रेलर रिलिज भएदेखि नै आमिरको चरित्र र जोनी डेपको 'क्याप्टेन ज्याक स्प्यारो'बीच समानता देखाइरहेका छन्।
यसका साथै उनीहरूले एक्सनमा पनि समानता रहेको र पात्रहरू पनि सो सिनेमाबाट प्रभावित रहेको बताएका छन्।
ट्वीटरमा फिल्मको यस्तो आलोचना भएको छ।
