दक्षिण भारतिय कन्नडा फिल्मका सुपरस्टार अर्जुन सर्जाले अभिनेत्री श्रुथी हरिहरनविरूद्ध पाँच करोड भारू बराबरको क्षतिपुर्तिको माग गर्दै मानहानी मुद्धा दायर गरेका छन्।
हरिहरनले अर्जुनलाई 'भिसमाया' फिल्मको सुटिङ सेटमा यौन उत्पीडन गरेको आरोप लगाएकी थिइन्। उनले सो आरोप हाल चलिरहेको 'मिटु' अन्तरगत लगाएकी हुन्।
उनीविरूद्ध अर्जुनका भान्जा धुर्व सूर्याले अभिनेताका तर्फबाट बैङ्लुरू सहरको नागरिक अदालतमा मुद्धा दायर गरेका हुन्।
यो मुद्धा दायर गर्नु अघि अर्जुनका व्यवस्थापकले साइबर क्राइम सेलमा अभिनेताको सामाजिक संजाल एकाउन्ट ह्याक भएको दाबी गर्दै अर्को एक उजुरी पनि दर्ता गराएका छन्।
यस्तै हरिहरनले लगाएको आरोपमा अर्जुनले यसअघि सो आरोप को खन्डन गर्दै सो आरोपबाट आफू दु:खी भएको र त्यसलाई कसरी सुधार गर्ने बारेमा केहि थाहा नभएको बताउँदै मानहानीका लागि उजुरी दर्ता गर्ने बताएका थिए।
उनले पेसाको आडमा एक महिलालाई छुने सस्तो मानसिक्ता आफूमा नभएको भनाइ राखेका थिए। फिल्मका निर्देशकले पनि अभिनेताको समर्थन गरिसकेका छन्।
अर्जुनले उजुरी दर्ता गराएपछि अभिनेत्री हरिहरनले सोका लागि आफूलाई कसैले नउक्साएको र सो आरोपलाई परमाणित गर्ने प्रशस्त प्रमाण आफूसँग भएको दाबी गरेकी छिन्।
यससँगै उनले कर्नाटकका फिल्म च्याम्बर अफ कमर्शका प्रमूख सा रा गोबिन्दु मुद्धाप्रति गम्भिर नभएको भन्दै आलोचना गरेकी छन्। चेम्बरमा कार्यक्षेत्रमा महिलाप्रति हुने हिंसाको उजुरीका लागि आधिकारिक निकाय छैन्।
नायिकाको आरोपपछि अर्का अभिनेता तथा कंग्रेस नेता अम्बरेशले दुबैबिच भेटघाट गराएर सहजिकरण गर्ने प्रयास गरेका थिए।