बलिउड अभिनेता अक्षयकुमार यतिबेला आफ्नो अगामी रिलिज 'गोल्ड'को रिलिजको प्रचारप्रसारमा व्यस्त छन्। गैरफिल्मी पृष्ठभूमिबाट आएर बलिउडमा सफल हुने निक्कै कम कलाकारको सूचिमा अक्षयकुमार पर्छन्।
ब्याङ्कंकमा कुक हुँदै बलिउड आइपुगेका अक्षयका लागि बलिउडमा टिक्नु सहज थिएन। संघर्षकालिन समयमा उनी थुप्रैपटक बलिउडबाट अस्वीकृत हुनुपरेको थियो।
यसको खुलासा अक्षयले एक भारतको 'मिडडे' दैनिकलाई दिएको अन्तरवार्तामा गरेका छन्। कुरा ९० को दशकको हो। उनले आमिर खानको 'जो जीता वही सिकन्दर' फिल्ममा साइड रोल गर्नका लागि अडिसन दिए तर फिल्म निर्माण पक्षले उनलाई मनपराएन र उनी फिल्मबाट अस्वीकृत भए। पछि सो रोल दीपक तिजोरीले गरे।
फिल्मका निर्देशक मन्सुर खानले अक्षय सो रोलका लागि योग्य नभएको भन्दै अस्वीकार गरेका थिए। बलिउडमा 'खिलाडी' फिल्मबाट आफ्नो परिचय स्थापित गरेका अक्षय 'सौगन्ध' फिल्मबाट बलिउड प्रवेश गरेका थिए। उनी अनुबन्धित नभएको आमिरको सो फिल्म सन् १९९२ मा रिलिज भएको थियो।
अब्बास मस्तानको सस्पेन्स थ्रिलर पनि आमिरको फिल्म रिलिज भएकै वर्ष रिलिज भयो। सोही फिल्म हिट हुनपुग्यो। 'खेलाडी' फिल्मको सफलताले उनलाई बलिउडमा चिनाउने काम गर्यो। तत:पश्वात उनले खेलाडी नाम भएका थुप्रै फिल्ममा काम गरेर बलिउडमा 'खिलाडी' अभिनेताको उपाधि कमाउन सफल भए।
आज पनि उनलाई बलिउडका 'खिलाडी' अभिनेता भनेर भनिन्छ।
आमिरको सो फिल्मका अलवा उनी अजय देवगनको डेब्यू फिल्म 'फूल और कांटे'बाट पनि निकालिएका थिए। उनलाई त्यतिबेला मध्यरातमा फोन गरेर उनको सट्टा फिल्म अरू कोहीलाई लिइएकोले फिल्म सुटिङमा नआउन भनिएको थियो। उनी फिल्मको मुख्य भूमिकामा छनौट भएका थिए।
यसरी फिल्मबाट अस्वीकृत हुने र अन्तिम समयमा निकालिने भए पनि अक्षयले सन् १९९४ बाट बलिउडमा आफ्नो पहिचान राम्ररी स्थापित गरे। सो समयमा उनलाई एकपछि अर्को फिल्महरूको प्रस्ताव गरियो। सन् १९९४ मा मात्रै उनका १२ वटा फिल्म रिलिज भए। ती १२ फिल्मको सूचिमा 'मोहरा', 'मै खिलाडी तु अनाडी', 'सुहाग', 'ऐलान', 'ये दिल्लगी', 'जय किशन', 'जख्मी दिल', जालिम', 'हम है बेमिसाल' जस्ता फिल्म छन्।
उनले सन् १९९१ देखी २००० को बीचमा ४२ फिल्ममा काम गरे जसमा १२ फिल्म हिट सावित भए। हाल अक्षय प्रत्येक साल ३-४ फिल्म गर्छन्। पछिल्ला केहि वर्षमा उनका फिल्महरू निरन्तर सफल भइरहेका छन्। उनी धेरै नाफा कमाइदिने अभिनेताको सूचिमा छन्। उनका फिल्म जति अन्य अभिनेताको फिल्म लगातार हिट हुन सकेको छैन्।
पछिल्लो समयमा उनले आफूलाई विषयप्रधान फिल्ममा प्रस्तुत गर्न थालेका छन् जसलाई दर्शकहरूले पनि राम्रोगरी रूचाइरहेका छन्। 'रूस्तम', प्याडम्यान, , जोली एलएबी २, ट्वाइलेट एक प्रेमकथा, एयरलिफ्ट, बेबी आदि फिल्म यसका उदाहरण हुन्।
अक्षयको 'गोल्ड' १५ अगस्टमा रिलिज हुँदैछ।
