संजय दत्तको जीवनीमा आधारित 'सञ्जु'मा गरेको कामका लागि तारिफ बटुलेका रणवीर कपुरले संजय दत्तले २७ वर्ष अगाडी अभिनय गरेको हिट फिल्म 'सडक'को रिमेकमा काम गर्ने भएका छन्।
फिल्मको रिमेक बन्ने घोषणा सो फिल्मका निर्माता-निर्देशक महेश भट्टले गत वर्ष नै गरेका थिए। अब सो फिल्मको रिलिज मितिसमेत घोषणा भएको छ। भारतीय संचारमाध्यमका अनुसार फिल्म आगामी वर्ष नोभेम्बर १९ मा रिलिज हुनेछ। बलिउड फिल्मका बजार विश्लेषक तरण आदर्शले गरेको ट्वीटलाई आधार मान्दै सो कुरा लेखेका हुन्।
संजय दत्त र पूजा भट्टको मुख्य भूमिका रहेको फिल्म सन् १९९१ मा रिलिज भएको थियो। फिल्म १९७५ मा रिलिज भएको हलिउड फिल्म 'ट्याक्सी ड्राइभर' अघोषित रिमेक थियो। भारतीय संचारमाध्यमका अनुसार फिल्ममा आलिया भट्ट तथा रणवीरको जोडी आउने प्रबल सम्भावना छ।
उनीहरूबीच हाल प्रेम चलिरहेको चर्चा छ। यदि 'सडक २'मा एकसाथ आएमा यो उनीहरूको साथसाथमा दोश्रो फिल्म हुनेछ। उनीहरूको जोडी छिट्टै नै 'ब्रम्हास्त्र' फिल्ममा देखिनेछ।
हाल आलिया र रणवीरको चर्चा सुरू भएपनि यसअघि संजय र पूजा नै फिल्ममा हुने चर्चा पनि चलेको थियो।