समिक्षकहरूबाट चर्को आलोचना खेपेपनि सलमान खानको 'रेस ३'ले भारतीय घरेलु वक्सअफिसमा पहिलो साता १५० करोड भारूको कमाइ गरेको छ। इन्डियन एक्सप्रेसका अनुसार फिल्मले १४८.०५ करोड भारूको कमाइ गरेको हो। यस कमाइसँगै फिल्म बलिउडको सफलताको मानकका रूपमा रहँदै आएको सय करोडको क्लबमा समेत प्रवेश गरेको छ।
सलमानको यस एक्शन थ्रीलरले रिलिजको पहिलो दिन २९.१७ करोड भारूको कमाइ गर्दै रिलिज मितिमा सर्वाधिक व्यापार गर्ने फिल्मको रेकर्डसमेत कायम गर्यो। सिक्वल फिल्ममा यस्तो रेकर्ड राख्ने 'रेस ३' एकमात्र फिल्म हो। यसअघिका फिल्ममा सैफ अलि खानले मूख्य भूमिका निभाएका भएपनि तेश्रो सिक्वलमा सलमान प्रवेश गरेका हुन्।
फिल्मको यो लोभलाग्दो कमाइमा सलमानको स्टारपावरले काम गरेको धेरैको ठहर छ। फिल्मले आकर्षक कमाइ गरेपछी अभिनेता सलमानले शुक्रबार ट्विट गर्दै आफ्ना प्रशंसकहरूलाई धण्यवाद दिए।
फिल्ममा सलमानका अलावा, अनिल कपुर, बबी देवल, ज्याकलिन फर्नान्डिज, फ्रेडी दारूवाला। सकिब सलेम तथा डेजी शाहको अभिनय रहेको छ। रेमो डिसुजाले निर्देशन गरेको 'रेस ३' थ्रीडिमा समेत रिलिज गरिएको छ।
