'पद्मावत'मा अलाउद्दिन खिल्जीका रूपमा सबैको मन जितेका रणवीर सिंह फेरि अर्को भूमिकाबाट मन जित्न तयार भएका छन्। रोहित शेट्टीको निर्देशनमा बनिरहेको ' सिम्बा'' फिल्मबाट निडर प्रहरी अधिकारीको रूपमा दर्शकको मन जित्ने तयारी उनले गरेका हुन्।
निर्देशक शेट्टीले फिल्ममा रहेको उनको पात्रको 'गेटअप' पोस्ट गर्दे उनको पात्र सार्वजनिकीकरण गरेका हुन्।
सार्वजनिक तस्विरमा रणवीर अजय देवगनको 'सिंघम' शैलीको गेटअपमा प्रस्तुत भएका छन्। फिल्ममा अजयको विशेष भूमिका रहनेछ।
फिल्ममा कस्तो कथा रहनेबारेमा केहि सार्वजनिक नभएपनि भारतीय संचारमाध्यमहरूले सुपरहिट तेलेगु फिल्म 'टेम्पर'को रिमेक भएको अनुमान लगाएका छन्। फिल्म रिमेक भएको खण्डमा फिल्मले एक भ्रष्ट प्रहरी अधिकारीको कथा भन्नेछ।
रोहितले फिल्म 'मसाला एक्सन'ले भरिएको हुने बताएका छन्। फिल्ममा रणवीरको जोडी सैफअलि खानकी छोरी सारा अलि खान बनेकी छन्।
'सिम्बा' यसै वर्ष डिसेम्बर २८ मा रिलिज हुने प्रारम्भिक अनुमान छ।