गायक तथा अभिनेता प्रकाश सपूतले राजनीतिमा खुलेर सहभागी हुने निर्णय गरेको बताएका छन्।
राष्ट्रिय स्वतन्त्र पार्टी (रास्वपा) बाट समानुपातिक उम्मेदवार सूचीमा रहेका प्रकाशले सोमबार सामाजिक सञ्जालमा एक पोस्ट गर्दै यस्तो घोषणा गरेका हुन्।
उनले कसैप्रति अपमान वा अनादर नगर्ने प्रतिबद्धतासहित नयाँ समय र नयाँ आन्दोलनको सम्बोधन गर्न नयाँ राजनीतिक शक्ति स्थापना गर्ने यात्रामा खुलेर सहभागी हुने निर्णय गरेको बताएका छन्।
प्रकाशले फेसबुकमा रास्वपा सभापति रवि लामिछाने र वरिष्ठ नेता बालेन शाहसँगको तस्बिर राख्दै उनीहरूलाई नै सम्बोधन गरेर आफ्नो धारणा सार्वजनिक गरेका हुन्।
उनले लेखेका छन्, 'मैले बडो दुःख, संघर्ष, मेहनत र धैर्यले टिकाएको मेरो कला सिर्जनामार्फत रिझाएका विभिन्न दलमा आस्था राख्ने थुप्रै दर्शक–श्रोताको मन दुखाएर तपाईंहरूसँग हातेमालो गर्दैछु। पेसागत र व्यावसायिक हिसाबले यो मेरो जीवनकै कठोर निर्णय हो।'
प्रकाशले आफ्नो निर्णय गलत साबित नहुने विश्वास व्यक्त गर्दै भनेका छन्, 'कुनै एउटा दलमा लागेको भनेर अहिले मसँग मन दुखाउने मेरा प्रिय दर्शक–श्रोताको मन हामीले हाम्रो काम र इमानदारीले जित्नेछौं। हामी सँगै देशले जित्नेछ।'
हालै देशभरका विभिन्न मेला, महोत्सवमा लाखौं नेपाली नागरिकसँग प्रत्यक्ष भेटेर फर्किएको बताउँदै प्रकाशले जनताको मनोविज्ञानबारे पनि धारणा राखेका छन्।
उनका अनुसार सामाजिक सञ्जालमा देखिएजस्तो जनता उग्र वा उत्तेजित नभई शान्त भए पनि गहिरो निराशामा छन्।
प्रकाश लेख्छन्, 'नेता र निर्वाचनप्रति उनीहरूको विश्वास उडिसकेको छ। यद्यपि तपाईंहरूको उदयसँगै मैले जस्तै अब 'अन्तिम पटक' कसैलाई विश्वास गर्दैछन्।'
उनले जनता उत्साहित भए पनि अझै ढुक्क हुन नसकेको उल्लेख गरेका छन्।
उनले अगाडि लेखेका छन्, 'थुप्रै प्रश्न र डरका साथ उनीहरू केवल आशावादी छन्। जो आए पनि सबै उस्तै हुन् भन्ने मनोविज्ञान बलियो छ। तपाईंहरू किन सबै उस्तै होइनौं, किन फरक हौं, किन राजनीतिमा आउनुभयो–यो बुझाउनुपर्ने छ।'
राजनीतिक आडमा केही व्यक्ति र शक्तिले बन्धक बनाएको व्यवस्थालाई मुक्त गराउनुपर्ने आवश्यकता औंल्याउँदै प्रकाशले सुधार, विकास र समृद्धिको जिम्मेवारी बोक्ने बेला आएको बताएका छन्।
उनले लेखेका छन्, 'कम्तिमा तपाईंहरूको नेतृत्वमा देश सुधारको बाटोमा अघि बढ्नेछ र समृद्ध नेपालको सुरूआत त अवश्य हुनेछ भन्ने विश्वासका साथ म त्यो यात्रामा साथी र साक्षी बन्न आएको हुँ।'
उनले यो पनि भनेका छन्, 'अब म र म जस्तै आम नेपालीहरूले कुनै व्यक्ति वा शक्ति (दल) लाई अन्तिम पटक विश्वास गर्दैछौं। मतदाताको अनुहारमा मैले अन्तिम आशा र उत्साह देखेको छु। अब तपाईंहरूलाई निराश बनाउने छुट छैन।'
संगीतबाट कलाकारितामा उदाएका प्रकाश पछिल्लो समय फिल्म अभिनयमा व्यस्त छन्।
