फिल्म 'डोरी' का निर्देशक अरूण लामाले नयाँ फिल्मको निर्माण घोषणा गरेका छन्।
उनले एक पोस्टर ल्याउँदै फिल्म 'तथास्तु' निर्माण गर्ने घोषणा गरेका हुन्।
निर्देशक लामाले 'तथास्तु' केवल फिल्म नभइ कर्म, भाग्य र आन्तरिक रूपान्तरणको कथा भएको बताए। उनका अनुसार फिल्मले आध्यात्मिक यात्रा, अन्तरद्वन्द्व र सामाजिक यथार्थबीचको द्वन्द्व प्रस्तुत गर्नेछ। साथै,‘सिमुलेसन थ्योरी’ को पृष्ठभूमिमा दुई लोक — भगवानको लोक र मानिसहरूको लोकबीचको कथा समेटिने निर्देशक लामाले जनाए।
फिल्मको नाम 'तथास्तु' राख्नुको कारणबारे उनले भने, 'यो शब्दको अर्थ हो, जसरी तपाईंले चाहनुभयो, त्यसैगरी होस्। तर के हामीले चाहेका सबै कुरा साँचिकै ठीक हुन्छन् त? के हामी त्यसको लागि तयार छौं त? जीवनमा प्राप्तिभन्दा बुझाइ महत्वपूर्ण हुन्छ। तपाईंले मागेको कुरा तब मात्र सार्थक हुन्छ, जब तपाईं त्यसलाई ग्रहण गर्न तयार हुनुहुन्छ।'
फिल्ममा नयाँ पुस्ताका चर्चित कलाकारहरू, नेपाल र भारतका अप्रत्याशित तर सक्षम अनुहारहरू, स्थापित कलाकार तथा उदाउँदा प्रतिभाहरूलाई स्थान दिने निर्देशक लामाले बताए। नेपाली र हिन्दी दुवै भाषामा निर्माण हुने यो फिल्मको छायांकन नेपाल र भारतमा गर्ने योजना छ।
फिल्मको सुटिङ पनि दुई चरणमा गरिने निर्देशक लामाले बताए। यसअघि निर्देशक लामाले फिल्म ‘डोरी’ निर्माण गरेका थिए। जुन फिल्मले राम्रो व्यापार गरेन।
आफ्नो डेब्यु फिल्म 'डोरी' प्रजातन्त्र समर्थक आन्दोलनको कारण दर्शकसम्म पुग्न नसकेको बताए। उनले थपे, 'हलहरू सुनसान हुँदा फिल्मले अपेक्षित व्यावसायिक सफलता पाउन सकेन। तर जसले हेरे, प्रायः सबैले मन पराए।'
'तथास्तु' को थप जानकारी दिनुपर्दा यो फिल्म जी. सेभेन प्रोडक्सन् प्रा.लिको प्रस्तुतिमा बन्न लागेको हो। फिल्मको छायांकन अर्को वर्ष अर्थात २०८३ को सुरूआतमा हुनेछ भने प्रदर्शन सन् २०२७ मा गरिने सार्वजनिक पोस्टरमा उल्लेख छ।
