शोभित बस्नेतको निर्देशनमा बनेको फिल्म 'पीआर' को टिजर बिहीबार काठमाडौंमा एक कार्यक्रमकाबीच सार्वजनिक गरिएको छ।
अस्ट्रेलिया पुगेका नेपाली युवाहरूले स्थायी आवासीय प्रमाणपत्र (पीआर)का गर्ने संघर्षको कथा यसमा देखाइएको छ। त्यहाँ उनीहरूले गर्ने संघर्ष, प्रेम, बदलाको कथा यसले भन्छ।
सलोन–सलिना फिल्मस्को ब्यानरमा निर्माण भएको फिल्ममा आर ए सुरज पौडेल, विनिता कार्की, राजन कुँवर, पुजा चौधरी, विमला खत्री आश्मा अधिकारी, कुशल थापा, गणेश बुढाथोकी, नवीन घायललगायत कलाकारहरूको अभिनय छ।
विशेष भूमिकामा नीर शाह, गौरी मल्ल, रविन्द्र खडका, दिक्पाल कार्की, उत्तम केसी लगायतले अभिनय गरेका छन्।
शोभित बस्नेतकै कथा रहेको फिल्ममा रन्जित शाह र सन्तोष तिवारी प्रस्तुतकर्ता छन्। निर्माता प्रदीप दाहाल र लक्ष्मण सापकोटा हुन्।
फिल्ममा मानस राज र भिम बीसीको संगीत, रामजी लामिछानेको नृत्य, गणेश बुढाथोकीको लेखन, सौरभ सायमी र सौरभ लामाको छायांकन तथा बन्दे प्रसादको सम्पादन छ।
अस्ट्रेलियामै छायांकन गरिएको फिल्म असार अन्तिमबाट अस्ट्रेलियासँगै न्युजिल्यान्डका सहरमा रिलिज गर्ने तयारी निर्माणपक्षको छ।
नेपालमा फिल्म दसैं आसपासमा रिलिज गरिने जनाइएको छ। आरआर फिल्मसले यसलाई स्वदेशमा वितरण गर्नेछ।
