नेपाली नयाँ वर्ष फिल्मको व्यापारका लागि सुखद मानिँदै आएको छ। त्यसैले निर्माताहरू फिल्म रिलिज गर्न दसैं-तिहारपछि नयाँ वर्षको दिन रोज्छन्।
यसपालि नयाँ वर्ष २०८२ को अवसर पारेर दुइटा फिल्म एकसाथ रिलिज भए — पिताम्बर र कर्मा।
यी दुईमध्ये 'पिताम्बर' ले वर्ष २०८२ को राम्रो सुरूआत गरेको छ। यो फिल्म देशभरि नै सफलतापूर्वक प्रदर्शन भइरहेको छ। बक्स अफिसमा राम्रो व्यापार गरिरहेको निर्माण पक्ष बताउँछ।
प्रदीप खड्का, सौगात मल्ल, दयाहाङ राई लगायतका स्टार कलाकारहरू एउटै फिल्ममा भएकाले 'पिताम्बर' प्रति दर्शकको आकर्षण देखिएको हो। त्यसमाथि रिलिजअघि नै यसले राम्रो आशा जगाएको थियो। एक्सन फिल्म भएकाले दर्शकहरू फिल्म हेर्न उत्साहित थिए।
कृषा चौलागाईं निर्देशित पिताम्बर गत शुक्रबार रिलिज भएको थियो। पहिलो दिन नै यसले राम्रो ओपनिङ पायो। दोस्रो दिन शनिबार पनि राम्रो व्यापार गर्यो। आइतबार फिल्मको व्यापार केही कम भए पनि नयाँ वर्षको पहिलो दिन सोमबार फिल्म हेर्ने दर्शकको चाप ह्वात्तै बढेको छ।
सोमबार बिहानैदेखिका शोमा दर्शक अकुपेन्सी उच्च छ भने बेलुकीसम्मका शोको बुकिङ राम्रो देखिन्छ।
कीर्तिपुर सिने प्लेक्सका सञ्चालक नरेन्द्र महर्जन सोमबार आफ्नो हलमा पिताम्बरको शो दिनभर नै हाउसफुल रहेको बताउँछन्। हल सञ्चालकहरूको छाता संस्था नेपाल चलचित्र संघका अध्यक्षसमेत रहेका उनले भने, 'आज यहाँ पिताम्बरलाई ४ शो दिइएको थियो। चारवटै शो हाउसफुल भए।'
नेपालगन्जको सिने रोयलमा पिताम्बर हेर्ने दर्शकको भिड। तस्बिर सौजन्य: सिने रोयल
देशकै ठूलो मल्टिप्लेक्स चेन क्युएफएक्सकी महाप्रबन्धक तृप्ति गिरीले पनि आफ्ना हलहरूमा 'पिताम्बर' ले राम्रो व्यापार गरेको बताइन्।
'अरू नेपाली फिल्मको व्यापार पनि नराम्रो भन्नुपर्ने छैन। त्यसमध्ये पिताम्बरको सबभन्दा राम्रो देखिएको छ,' उनले भनिन्, 'नयाँ वर्ष विदाको दिन विगतमा पनि राम्रै हुने गरेको थियो। त्यसमाथि पिताम्बरको समीक्षा पनि राम्रो आइरहेको छ। त्यसैले भोलिका दिनमा व्यापारमा धेरै कमी चाहिँ नआउला भन्ने छ।'
'पिताम्बर' सँगै एकसाथ रिलिज भएको विपिन कार्की अभिनीत 'कर्मा' ले भने अपेक्षित व्यापार गर्न नसकेको देखिन्छ।
यो फिल्ममा दर्शक अकुपेन्सी कम भएपछि कतिपय हलले रिलिजको केही दिनमै शो घटाएका छन्। सोमबार भने कतिपय हलमा यो फिल्मले पनि राम्रो व्यापार गरेको देखिन्छ।
सौरभ चौधरी निर्देशित यो फिल्ममा विपिनका साथ उपासना सिंह ठकुरी, मुकुन भुसाल लगायतको अभिनय छ।
नयाँ वर्षमा काठमाडौंसहित मोसफलका हलमा पनि नेपाली फिल्म हेर्ने दर्शक उल्लेख्य हुन्छन्। यसअघि रिलिज फिल्ममा पनि दर्शकको चाप बढेको हल सञ्चालकहरू बताउँछन्। उदाहरणका लागि, दोस्रो सातामा प्रदर्शन भइरहेको प्रकाश सपुत निर्देशित 'वसन्त' ले नयाँ वर्षको दिन सुखद व्यापार गरेको छ।
यो फिल्मको व्यापार खासगरी पश्चिम नेपालमा राम्रो भइरहेको छ। पोखरा, चितवन, बुटवल, नेपालगन्ज लगायतका सहरमा वसन्तले राम्रो अकुपेन्सी पाएको छ।
त्यस्तै, फागुन २९ मा रिलिज 'अञ्जिला' पाँचौं सातामा प्रदर्शनरत छ। मिलन चाम्स निर्देशित यो फिल्मको व्यापार अहिलेसम्म पनि राम्रो देखिएको छ। नयाँ वर्षको पहिलो दिन पनि प्राप्त शोमा दर्शक अकुपेन्सी राम्रो रह्यो।
नेपालगन्जको मल्टिप्लेक्स सिने रोयलका प्रमुख कार्यकारी रितेश श्रेष्ठ सोमबार अधिकांश फिल्ममा दर्शक अकुपेन्सी शतप्रतिशत रहेको बताउँछन्।
'आज सबै फिल्मका शोहरू हाउसफुल भए,' उनले भने, 'कतिपय दर्शक टिकट नपाएर फर्किनुपरेको छ।'
तीमध्ये 'पिताम्बर' ले धेरै शो पाएको र पाएका शोमा दर्शक अकुपेन्सी उच्च रहेको उनले बताए। उनका अनुसार नेपालगन्जमा 'पिताम्बर' सँगै 'वसन्त', 'अन्जिला', 'कर्मा' र भारतीय फिल्म 'जाट' ले राम्रो व्यापार गरिरहेको छ। केही हलमा कुमार कट्टेल निर्देशित फिल्म 'लाज शरणम' पनि प्रदर्शनरत छ।
नेपाल चलचित्र संघका अध्यक्ष नरेन्द्र महर्जन नयाँ वर्षका कारण भन्दा फिल्मकै कारणले दर्शकहरू हलसम्म तानिएको बताउँछन्।
'नयाँ वर्ष र दसैं-तिहार भन्दैमा सबै फिल्म चल्छन् भन्ने हुँदैन। यसअघि नयाँ वर्षमा स्टार कलाकार भएका फिल्मले पनि दर्शक नपाएका उदाहरण छन्,' उनले भने, 'फिल्म चल्न पहिले फिल्मले नै तान्नुपर्छ। यसपटक पनि फिल्मले नै तानेको हो।'
***
