सौगात मल्ल र बेनिशा हमाल अभिनीत फिल्म 'सिटामोल' साउन २३ गतेदेखि प्रदर्शनमा आउने भएको छ।
निर्माण पक्षले सोमबार पोस्टर सार्वजनिक गर्दै प्रदर्शन मिति घोषणा गरेको हो।
पोस्टरमा फिल्मका मुख्य कलाकार सौगात मल्ल र बेनिशा हमाललाई प्रस्तुत गरिएको छ। सौगात बैशाखीको सहाराले हातमा रातो भाले समातेर उभिएका छन्, भने उनको छेउमा बेनिशा बच्चा बोकेर खुसी मुद्रामा देखिएकी छन्। फिल्ममा यी दुई श्रीमान–श्रीमतीको भूमिकामा देखिएको अनुमान पोस्टरबाट गर्न सकिन्छ।
राज बहादुर सानेको निर्देशनमा बनेको 'सिटामोल' ले माओवादी जनयुद्धको कथा उठान गरेको जनाइएको छ। यसमा सौगातले जनयुद्धको घाइतेको भूमिका निर्वाह गरेका छन्। फिल्ममा सौगात र बेनिशासहित लोकेन्द्र लेखक, भुगोल कार्की, हिउँवाला गौतम, दिनेश रेग्मी, समिप निरौला, जानुका विश्वकर्मा, आरआर खड्का, ज्ञानु मल्ल, पवन भट्टराई, काजल भुजेल र बालकलाकार करण नेपाली र आराध्या राज्यलक्ष्मी डिसीको अभिनय छ।
तुलसीदेवी फिल्म प्रालिले जुनतारा फिल्मस्संगको सहकार्यमा निर्माण गरेको 'सिटामोल' को कथा प्रदीप भारद्धाज र निर्देशक सानेले लेखेका हुन्। सिमोस सुनुवार प्रस्तुतकर्ता रहेको फिल्ममा भुगोल कुमार कार्की र विकाश राज जोशी निर्माता तथा अप्सरा नेपाली, अजय मल्ल र कुमार केसी कार्यकारी निर्माता छन्। गंगाराम श्रेष्ठ सह–निर्माताको रूपमा छन्।
दिव्य सुवेदीको छायांकन, बाबुल गिरीको संगीत, कविराज गहतराजको कोरियोग्राफी रहेको फिल्ममा बन्दे प्रसादको सम्पादन छ।
