प्रकाश सपुत र स्वस्तिमा खड्का अभिनीत फिल्म 'वसन्त' शुक्रबारदेखि देशभरका हलमा प्रदर्शनरत छ। यो फिल्मलाई लिएर ठूलो अपेक्षा राखिएको थियो।
यद्यपि, फिल्मले ओपनिङ अपेक्षित नगरे पनि सुस्त गतिमा व्यापार बढाइरहेको छ। फिल्मको व्यापार काठमाडौंमा भन्दा पश्चिम नेपालका हलमा सुखद् देखिन्छ।
फिल्मलाई काठमाडौं बाहिर वितरण गरेको एफडी कम्पनीका छविराज ओझा पोखरा, नारायणगढ, बुटवल, नेपालगञ्ज, दाङ लगायतका स्थानमा फिल्मले राम्रो व्यापार गरिरहेको बताउँछन्।
उनका अनुसार फिल्मले आइतबारसम्म (३ दिन)मा मोफसलमा ७० लाख रूपैयाँ ग्रस कलेक्सन गरेको थियो। त्यसपछिका दिनको व्यापारिक रिपोर्ट आउन बाँकी छ।
वितरक ओझाले भने, 'यसअघि प्रकाशको परदेशी २ पनि पश्चिमतिर राम्रो देखिएको थियो। यो पनि त्यस्तै देखिएको छ। माहोल हेर्दा फिल्म लामै समयसम्म जान्छ जस्तो लाग्छ।'
काठमाडौंमा फिल्म वितरण गरेको कम्पनी डीसीएनका प्रमुख अशोक शर्माले पनि दर्शकले फिल्म राम्रो मानिरहेको बताउँदै लामो समय जाने विश्वास रहेको बताए।
फिल्मको देशब्यापी कमाइ मंगलबारसम्ममा डेढ करोड हाराहारी पुगेको अनुमान गरिएको छ।
बुधबार पनि फिल्ममा दर्शक अकुपेन्सी सुखद् देखिएको छ।
'वसन्त' प्रकाशको निर्देशनमा बनेको पहिलो फिल्म हो। फिल्मले जातीय समानताको कथा बोल्छ।
-1746513231.jpg)
