शुक्रबारदेखि प्रदर्शनमा आएको प्रकाश सपुत निर्देशित फिल्म 'वसन्त' ले सुखद् सुरूआत गर्न सकेन।
तथापि दर्शकहरूले चलचित्र रूचाएका छन्। र, सकारात्मक प्रतिक्रिया दिइरहेका छन्।
फिल्मको विषयवस्तु, गीतसंगीत पक्ष र प्रस्तुतिको प्रशंसा गरिरहेका छन्।
यो फिल्म हेर्न पुगेका दर्शकहरूलाई प्रकाशले केही कुरा 'सरप्राइज' पनि दिएका छन्। यसमा अभिनेता राजेश हमाललाई दर्शकले हेर्न पाउँछन्। धेरैपछि फिल्मको पर्दामा उनलाई देख्दा दर्शकहरू सरप्राइज मात्रै होइन नोस्टाल्जिक पनि हुन्छन्।
त्यस्तै, अभिनेताहरू दीलिप रायमाझी, निश्चल बस्नेत, नाजिर हुसेन, अभिनेत्रीहरू करिश्मा मानन्धर, केकी अधिकारी, प्रियंका कार्कीलाई समेत पर्दामा देख्न सकिन्छ।
लोकदोहोरीकी अहिलेकी चर्चित गायिका शान्तिश्री परियार, मोडल अञ्जली अधिकारी समेत फिल्ममा देखिन्छन्।
एकै फिल्ममा यति धेरै चर्चित कलाकारहरूको अभिनय रहे पनि प्रकाश सपुतले यसबारे प्रदर्शनअघि जानकारी दिएका थिएनन्।
फिल्म रिलिजपछि यी कलाकारहरूको दृश्यको भिडिओ 'क्लिप' टिकटकमा समेत भाइरल भइरहेका छन्।
कतिपयले यति धेरै कलाकारहरू रहे पनि प्रकाशले किन रिलिजअघि खुलाउन चाहेनन् भन्ने चासो समेत राखिरहेका छन्।
उनले प्रदर्शनअघि यी कलाकारहरूबारे जानकारी दिएको भए यसले बिक्रीमासमेत प्रभाव पार्ने उनीरूले बताइराखेका छन्।
यी कलाकारहरूको भूमिका कस्तो छ र कति महत्त्वपूर्ण छ त्यो भने हलमा फिल्म हेर्न दर्शकले महसुस गर्छन्।
फिल्म 'वसन्त' मा प्रकाश र स्वस्तिमा खड्का शीर्ष भूमिकामा छन्। साथमा खड्गबहादुर पुन (खबपु), प्रभात पाल ठकुरी, श्री शिभांसी, उर्मिला लाम्गादे, अनुप बराल, प्रकाश घिमिरे लगायत कलाकारहरूको अभिनय छ।
मोहन विश्वकर्मा र बिन्दु बोहोरा निर्माता हुन् भने कार्यकारी निर्मातामा बिरेन्द्र नारायण श्रृेष्ठ, अनुरोध भट्टराई र नाना थकाली छन्।
'वसन्त' प्रकाश सपुतको निर्देशनमा बनेको पहिलो फिल्म हो। अभिनेताका रूपमा भने उनका दुई फिल्म 'परदेशी २' र 'पूर्ण बहादुरको सारंगी' सुपरहिट भइसकेका छन्।
