बिहीबारदेखि प्रदर्शन भइरहेको फिल्म 'अञ्जिला' को 'रात किन हुन्छ हजुर' बोलको गीत सार्वजनिक गरिएको छ।
पीडायुक्त शब्दहरू रहेको यस गीतले फिल्मकी प्रमुख पात्र एन्जिला तुम्बापो सुब्बाको जीवन गाथाका केही अंशहरू बयान गरेको छ। गीतमा थानेश्वर गौतम र शान्तिश्री परियारको स्वर रहेको छ भने थानेश्वरको संगीत र प्रभा बर्तौलाको शब्द रचना रहेको छ। यस गीतको संक्षिप्त अंश फिल्ममा समेत सुन्न सकिन्छ।
'अञ्जिला' नेपाली महिला राष्ट्रिय फुटबल टिमकी कप्तान एन्जिला तुम्बापो सुब्बाको जीवनीमा आधारित छ, जसमा एन्जिला आफैँले प्रमुख भूमिकामा अभिनय गरेकी छन्। यसमा उनको बाल्यकालदेखि खेल जीवनसम्मको संघर्ष र सफलताको भावुक कथा प्रस्तुत गरिएको छ। यस फिल्ममा एन्जिलाको साथमा सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङलगायत कलाकारको अभिनय छ।
