आज शुक्रबार फिल्म हलमा दीपक रौनियार निर्देशित फिल्म 'राजागंज' प्रदर्शनमा आएको छ।
विश्वका प्रतिष्ठित फिल्म फेस्टिभलमा प्रदर्शन भइसकेको यो फिल्मले बुधबार गरिएको प्रिमियरमा प्रशंसा पाएको छ।
सत्य घटनाको कथा समेटिएको 'राजागंज' ले नेपाल र भारतको सीमावर्ती सहरमा अपहरणमा परेका दुई बालकलाई मुक्त गराउन प्रहरीले चालेको खोजी अपरेसनको कथा उठाएको छ।
फिल्ममा आशा मगराती, दयाहाङ राई, विजय बराल, ऋचा शर्मा, गौमाया गुरुङ, पशुपति राई, पूर्वमिस नेपाल निकिता चाण्डक, पुष्पा यादव, आरती मण्डल, घनश्याम मिश्र, परमेश्वर कुमार झा, नीरज श्रेष्ठलगायत कलाकारको अभिनय छ।
फिल्मको निर्माणमा आदि फिल्म्सका तर्फबाट निर्देशक रौनियार र अभिनेत्री मगराती, बासुरी फिल्मसका तर्फबाट रामबाबु गुरुङ र मनिराम पोखरेल, अभिनेता दयाहाङ राई तथा तन्हाउसर गेटका तर्फबाट एलन आर मिलिगनले सहकार्य गरेका छन्।
यो फिल्म भेनिस, ह्याम्बर्ग, बुसान र मुम्बईजस्ता विश्वका ठूला फिल्म महोत्सवमा सहभागी भइसकेको छ।
