गायक तथा अभिनेता प्रकाश सपुतले धमाधम फिल्म साइन गरिरहेका छन्। उनी निर्देशित फिल्म 'वसन्त' चैत २२ गतेदेखि प्रदर्शनमा आउने तयारीमा छ भने उनले बाहिरी ब्यानरका एकपछि अर्को फिल्म साइन गरिरहेका हुन्।
प्रकाशले फिल्म 'सोल्टिनी' र 'हरिबहादुरको जुत्ता' को छायांकन सकेका छन् भने उनले 'माइतीघर' मा पनि शीर्ष भूमिकामा अभिनय गर्दैछन्।
हालै उनी अर्को फिल्म 'परालको आगो' मा अनुबन्धित भएका छन्। कथाकार गुरूप्रसाद मैनालीको कृति 'परालको आगो' मा आधारित रहेर यो फिल्म निर्माण हुन लागेको छ। फिल्म निर्माण कम्पनी हरिओम सिने मेकर्सका तर्फबाट निर्माता सुशील पोखरेलले प्रकाशलाई फिल्ममा अनुबन्ध गरेका हुन्।
मैनाली कथा पुरस्कार ट्रस्टले हरिओम सिने मेकर्स निर्माता कम्पनीलाई फिल्म निर्माणको मञ्जुरी दिइसकेको छ। 'परालको आगो' मैनालीको कथा संग्रह 'नासो' मा संग्रहित छ।
निर्माता पोखरेलका अनुसार प्रकाश फिल्मका प्रमुख दुई पात्रमध्ये एक हुनेछन्। यसअघि प्रमुख कलाकारका रूपमा जितु नेपाल र सुहाना थापा अनुबन्धित भइसकेका छन्।
फिल्ममा सुशील देवकोटाको लेखन, संकल्प भुजेलको छायांकन, रामजी लामिछानेको कोरियोग्राफी, सत्य–स्वरूपराज आचार्यको संगीत हुनेछ। फिल्मका निर्माण नियन्त्रण नगेन्द्र घिमिरे हुन्।
निर्माता पोखेलका अनुसार फिल्मको प्रदर्शन २०८२ मा हुनेछ। यो नाममा ४५ वर्षअघि निर्देशक प्रताप सुब्बाले फिल्म निर्माण गरेका थिए।
निर्माता पोखरेलले यसपटक लोकेसन, प्रस्तुतिकरण र पटकथालाई फरक किसिमले फिल्ममा प्रस्तुत गर्न लागेको बताए।
'परालको आगो' लक्ष्मण सुनारको निर्देशनमा बन्नेछ।
-1746513231.jpg)
