सुरेन्द्र पौडेलको निर्देशन रहने फिल्म 'वरिष्ठ बलराम' को शुभमुहूर्त गरिएको छ। गत बुधबार टाइटल टिजर सार्वजनिक गर्दै रिलिज डेट घोषणा गरिएको फिल्मको आइतबार मुहूर्त गरिएको हो।
निर्माणपक्षले काठमाडौंको बुढानीलकण्ठ मन्दिरमा पूजा गर्दै छायांकन समेत सुरू गरेको छ।
यो फिल्ममा दयाहाङ राई, विजय बराल, समृद्धि अर्याल, गौमाया गुरूङ, पशुपति राई, माओत्से गुरूङ, प्रदीप चौधरी, रामबाबु रेग्मीलगायतका कलाकारहरूको अभिनय रहनेछ।
यो फिल्मको निर्मातामा आशिष एच तामाङ र श्रीराज कार्की छन्।
निर्देशक पौडेलकै कथा र सम्पादन रहने फिल्ममा महेश दवाडीको लेखन रहने छ।
सामाजिक कथावस्तुमा आधारित 'वरिष्ठ बलराम' सन्देशमूलकसँगै मनोरञ्जनपूर्ण हुने निर्माण पक्षले जनाएको छ ।
चितवन र हेटौडाका विभिन्न जिल्लामा छायांकन गरिने फिल्ममा मानकृष्ण महर्जनको डिओपी रहनेछ।
तारानाथ न्यौपाने मुख्य सहायक निर्देशक रहेको फिल्ममा प्रशान्त शिवाकोटीको संगीत, सम्राट बस्नेतको द्धन्द निर्देशन, प्रदीप लामाको कोरियोग्राफी रहने छ।
'वरिष्ठ बलराम' निर्माण वृषभ सिद्धी इन्टरटेनमेन्टको प्रस्तुतिमा आन्भी फिल्मस्को सहकार्यमा हुनेछ।
फिल्मको प्रदर्शन मिति आगामी लक्ष्मी पूजाका दिन कात्तिक ३ गतेलाई तय छ। यसलाई काठामाडौं उपत्यकामा डीसीएन र उपत्यकाबाहिर कुवेर सिने डिस्ट्रिब्युसनले वितरण गर्नेछन्।
