फिल्म ‘दैव संजोग’ मा समावेश चर्चित गीत ‘अच्छा लेकिन लण्डनको चिसोले समाउला’ फेरि दर्शकमाझ आउने भएको छ।
शम्भुजित बाँस्कोटाको शब्द तथा संगीत रहेको गीत लामो समयपछि नयाँ भर्सनमा आउन लागेको हो।
अभिनेता राजेश हमालको कमब्याक फिल्म 'नरसिंहाः अवतार' मा यो गीतलाई समावेश गर्न लागिएको छ। त्यसका लागि भिडिओको छायांकन समेत भैसकेको छ।
पुरानो गीतमा शम्भुजित बाँस्कोटा, सुदेश शर्मा र गायिका देविका बन्दनाको स्वर छ। नयाँ भर्सनमा भने शम्भुजित र नयाँ पुस्ताकी चर्चित गायिका रचना रिमालले स्वर भरेका छन्।
यो गीतको भिडिओ हालसालै काठमाडौंको जरसिंह पौवामा ४ दिन लगाएर खिचिएको छ। सेट नै लगाएर हिमाललाई काखमा राख्दै यो गीतको भिडिओ छायांकन गरिएको हो।
भिडिओमा फिल्मका मुख्य कलाकारहरु राजेश हमाल, सरोज खनाल, राज कटुवाल, नीति शाह, उषा खड्गी, सनिशा भट्टराईले नृत्य गरेका छन्।
भिडिओलाई कविराज गहतराजले कोरियोग्राफी गरेका हुन्।
निर्देशक दिवाकर भट्टराईले १५ लाख रुपैयाँ खर्च गरेर भिडिओ खिचिएको बताए।
अभिनेता राजेश हमालले यो गीतले आफूलाई फेरि विगतमा फर्काएको भन्दै दर्शकले मन पराउने विश्वास व्यक्त गरेका छन्।
गीतको भिडिओमा नायक हमाल र अर्का नायक कटुवाललाई कर्नेलको अवतारमा देख्न पाइनेछ। यो फिल्ममा अभिनेता राजेश हमाल र सरोज खनालले ३२ बर्षपछि सहकार्य गरेका हुन्।
गीतको भिडिओ एक सय हाराहारी कोरस र त्यति नै संख्यामा दर्शक राखिएको छ। एक्सन र लभ स्टोरी कथामा निर्माण भएको यो फिल्ममा दर्शकले विविधता देख्न पाउने विश्वास निर्माणपक्षको छ।
यो फिल्मबाट राजेश हमालले ८ वर्षपछि कमब्याक गर्न लागेका हुन्। त्यस्तै, यो पूर्व मिस नेपाल उषा खड्गीको डेब्यू फिल्म हो।
'नरसिंहाः अवतार' चैत २९ गतेदेखि प्रदर्शनमा आउने तयारीमा छ।
