मंसिर र पुसमा नेपाली फिल्म रिलिजको चाप ह्वात्तै घटेको थियो। माघमा फिल्म रिलिजको संख्या केही बढे पनि हलमा दर्शकको खडेरी देखियो।
फागुनमा भने फिल्म रिलिज फेरि बढ्दैछ। र, फागुनमा रिलिज फिल्मले केही समयदेखि चिसिएको फिल्मको व्यापार समेत बढाउने विश्वास गरिएको छ।
फागुनको २ गते भ्यालेन्टाइन डेको अवसर पारेर दुइटा फिल्म एकैदिन रिलिज हुँदैछन्।
उक्त दिन दीपेन्द्र लामा निर्देशित फिल्म 'दुःखी आत्मा' र सुरेश न्यौपाने निर्देशित 'रंगी' प्रदर्शनमा आउने भएका हुन्।
'दुःखी आत्मा' मा दयाहाङ राई र आँचल शर्मा शीर्ष भूमिकामा छन् भने 'रंगी' सलोन बस्नेत, दिलीप रायमाझी, नम्रता श्रेष्ठ, आयुषी ढकाल लगायत कलाकारहरू छन्।
फागुन ९ गते फिल्म 'ताण्डवम्' रिलिज हुनेछ। जुनिम गहतराज निर्देशित यो फिल्ममा सरिना मगर, अंकित खड्का, अनुज पाण्डे, पुस्कर गुरूङ, प्रेम सुब्बा, जनिम गहतराज लगायतको अभिनय छ।
त्यस्तै, फागुन १४ गते एकैदिन तीनवटा फिल्म रिलिज हुँदैछन्। महाशिवरात्रिको अवसर पारेर फिल्म 'लाज शरणम्', 'फेरि रेशम फिलिली' र 'मायावी' प्रदर्शनमा आउने भएका हुन्।
कुमार कट्टेल (जिग्री) निर्देशित 'लाज शरणम्' मा सीताराम कट्टेल, विजय बराल, अर्पण थापा, सागर लम्साल, हरि निरौला, मुकुन्द श्रेष्ठ, बिजय लामा, अर्जुन घिमिरे, कमलमणि नेपाल, महेश त्रिपाठी लगायतको अभिनय छ।
निरोज महर्जन निर्देशित 'फेरि रेशम फिलिली' मा विनय श्रेष्ठ, सुपुष्पा भट्ट, कामेश्वर चौरासिया, नीर शाह, लक्ष्मी गिरी, प्रकाश घिमिरे, रवीन्द्र झा, शिशिर बाङ्देल, महेश त्रिपाठी, मेक्सम गौडेल लगायतले अभिनय गरेका छन्।
अर्को फिल्म 'मायावी' मा पल शाह र दीपिका प्रसाइ शीर्ष भूमिकामा छन्। दीवाकर भट्टराई निर्देशित यो फिल्ममा समीम खान, प्रशान्त ताम्राकार, सुशील सिटौला, करिश्मा श्रेष्ठ, लक्ष्मी गिरी, अंशु महर्जन, राजाराम पौड्याल लगायतको पनि अभिनय छ।
फागुन २३ मा फिल्म 'होस्टेल ३' रिलिज हुनेछ। सशान कंडेल निर्देशित यो फिल्ममा नयाँ पुस्ताका कलाकारहरूको बाहुल्यता छ। यसमा पारस बम ठकुरी, रिहान गिरी, पदम तामाङ, आशिष घिमिरे, सिम्रन पन्त, हाना नगरकोटी लगायतको शीर्ष अभिनय छ।
फागुन २९ मा फागु पूर्णिमाको अवसर पारेर दुइटा फिल्म रिलिज हुने तयारी छ। फिल्म 'आउट लः दफा २१९' र 'अञ्जिला' ले उक्त दिनका लागि प्रदर्शन मिति घोषणा गरेका छन्।
बिक्की महर्जन निर्देशित 'आउट लः दफा २१९' मा सुशील श्रेष्ठ शीर्ष भूमिकामा छन्। साथमा नरेश पौडेल, शिक्षा संग्रौला, सुमन भण्डारी, सोनी लागुन लगायतको पनि अभिनय छ।
त्यस्तै, मिलन चाम्स निर्देशित 'अञ्जिला' मा दयाहाङ राई, सिर्जना सुब्बा, माओत्से गुरुङ, विजय बराल, बुद्धी तामाङ, सुनिल थापा लगायतको अभिनय छ। यो महिला राष्ट्रिय फुटबल टिमकी गोलरक्षक एञ्जिला तुम्बापो सुब्बाको जीवनमा आधारित फिल्म हो। यसमा एञ्जिलाको पनि अभिनय छ।
यी दुई फिल्म रिलिजको एक दिनपछि दीपक रौनियार निर्देशित फिल्म 'राजागञ्ज' रिलिज हुँदैछ। यो फिल्म चैत १ गतेदेखि रिलिज तयारीमा छ।
