शुक्रबारदेखि प्रदर्शनमा आएको फिल्म 'एक्टरः टेक वन' ले दर्शकबाट सुखद् प्रतिक्रिया पाएको छ।
शनिबार बिहानैदेखि फिल्मको देशव्यापी अकुपेन्सी सुखद् रहेको निर्माणपक्षले जनाएको छ।
वितरक कम्पनी डीसीएनका अनुसार शनिबार देशभर करिब ३ सय ३० वटा स्क्रिनहरूमा फिल्म प्रदर्शन भएको छ।
यसैबीच, शनिबार फिल्मका कलाकारहरू हलहलमा पुगेर दर्शक प्रतिक्रिया लिएका छन्। अभिनेताहरू प्रदीप खड्का, राजबल्लभ कोइराला र अभिनेत्री दिव्या रायमाझी हलहरूमा पुग्दा दर्शकहरूले फिल्मको कथा तथा कलाकारहरूको अभिनयको तारिफ गरे। दिउँसो ललितपुरको पुल्चोकमा रहेको क्युएफएक्स सिनेमा हलमा पुग्दा दर्शकले 'एक्टरः टेक टु' को माग समेत गरे।
फिल्म सकिँदै गर्दा आकस्मिक रूपमा कलाकारहरू हल छिरेपछि दर्शकले 'वि वान्ट टेक टु' को नारा लगाएका थिए। खासगरी दर्शकहरूले यो फिल्मको क्लाइमेक्स अप्रत्याशित लागेको भन्दै तारिफ गरेका छन्।
यस फिल्ममा प्रदीप खड्का, आना शर्मा, दिव्या रायमाझी, राजबल्लभ कोइराला, दिव्य देव, सृजना अधिकारी, उषा रजक, सुशील सिटौलालगायतका कलाकारहरूको अभिनय छ। यो दिव्याको डेब्यु फिल्म हो भने राजबल्लभले एक दशकभन्दा लामो समयपछि कमब्याक गरेका हुन्।
राजन भुसाल निर्देशित फिल्मको स्क्रिप्ट आकाश बराल र निर्देशक भुसालले लेखेका हुन्। अधृत फिल्म्स् र मोती फिल्मको प्रस्तुति रहेको फिल्मको निर्माता थम्मन कुमार भण्डारी हुन्।
क्रियटिभ प्रोड्युसर मोती कार्की र सह–निर्माता अनिश भुसाल छन्।
