दीपेन्द्र लामाको लेखन तथा निर्देशन रहेको फिल्म 'दुःखी आत्मा' ले 'ब्रेकअप कविता' सार्वजनिक गरेको छ।
यो फिल्ममा कवि श्रवण मुकारूङले लेखेका १० वटा कविताहरू समावेश छन्। जसमध्ये पहिलो कविता बिहीबार सार्वजनिक गरिएको हो।
यसको भिडिओमा फिल्मका शीर्ष कलाकार दयाहाङ राई र आँचल शर्मा फिचर्ड छन्। कविता दयाहाङ स्वयंले वाचन गरेका छन्। उनले अभिनेत्री आँचल शर्माको अगाडि बसेर कविता सुनाइरहेको देखाइएको छ।
क्लक वर्क क्रियशनको व्यानरमा निर्माण भएको फिल्मको निर्माता हिमाल कडरिया हुन्।
फिल्ममा दयाहाङ र आँचलसहित अनुप विक्रम शाही, वुद्दि तामाङ, रेअर राई, पुष्कर गुरूङ, कविता आले लगायत कलाकारहरूको अभिनय छ।
सुदिप बराल कार्यकारी निर्माता रहेको फिल्ममा आलोक शुक्लाको छायांकन, निमेष श्रेष्ठको सम्पादन छ।
यो फिल्मलाई निर्माणपक्षले एडल्ट ड्रामा भनेको छ। फिल्म भ्यालेन्टाइन डेको अवसर पारेर फागुन २ गतेबाट प्रदर्शनमा आउने छ।
