नेपाली फिल्म 'ताण्डवम्' को पोस्टर सार्वजनिक गरिएको छ।
निर्माण पक्षले पोस्टर ल्याउँदै प्रदर्शन मिति समेत घोषणा गरेको छ। फिल्म महाशिवरात्रीको छेको पारेर फागुन ९ गतेबाट प्रदर्शनमा आउनेछ।
सार्वजनिक पोस्टरमा फिल्मका मुख्य कलाकारहरू क्यारेक्टर लुक्समा प्रस्तुत छन्। पुष्कर गुरूङ, प्रेम सुब्बा, सरिना मगर, अंकित खड्का, अनोज पाण्डे र जुनिम गहतराज पोस्टरमा देखिएका छन्। जुनिम गहतराजको निर्देशनमा यो फिल्म बनेको हो। कलरिस्ट जुनिमले यो निर्देशकीय डेब्यु फिल्म हो। कमल कार्की र गोपाल कटुवालको पनि फिल्ममा अभिनय गरेका छन्।
फिल्मको नामजस्तै यसको कथामा धार्मिक कनेक्सन रहेको पनि निर्माण टिमले जानकारी दिएको छ। एक नव–विवाहित जोडी जो आफ्नो पहिलो सन्तानको स्वागतको तयारी गरिरहँदा उनीहरूको जीवनमा घट्ने अकल्पनीय घटनाले निम्त्याउने उतारचढावको कथालाई पारिवारिक तथा एक्सन थ्रिलर जनरामा प्रस्तुत जनाइएको छ।
सिंहदेवी प्रोडक्सनको प्रस्तुति रहेको फिल्मको निर्माता धनकुमारी गहतराज, सविना मगर र मनिष गौतम हुन्। हरि घले लामाको छायांकन रहेको फिल्ममा सम्राट बस्नेतको एक्सन निर्देशन, सुशान्त गौतमको संगीत र कोबिद बज्रको ब्याग्राउण्ड म्युजिक छ। फिल्मको कथा, पटकथा तथा संवाद अनिरूद्ध आत्रेय र हुसेनले लेखेका हुन्।
निर्देशक जुनिमले यसअघि 'पानीफोटो', 'पशुपति प्रसाद २: भष्मेडन', 'खुस्मा', 'चिसो मान्छे', 'परस्त्री' लगायतका फिल्ममा कलरिस्टको रूपमा काम गरिसकेका छन्।
