फिल्म 'महाराजधिराज' को फर्स्टलुक पोस्टर सार्वजनिक गरिएको छ।
महाशिवरात्रिको अवसर पारेर मंगलबार पोस्टर सार्वजनिक गरिएको हो। पोस्टरमा दुइटा पात्र देखिएका छन्।
एकजना राजर्षी पहिरनमा रहेको देखिन्छन् भने अर्को पात्रलाई 'न्युड' अवस्थामा प्रस्तुत गरिएको छ। राजर्षी पहिरनमा रहेका व्यक्तिले शीरमा श्रीपेच र हातमा राजदण्ड बोकेर उभिएका छन्, जसले उनी राजा भएको संकेत गर्दछ। उनको अगाडि कुर्सीमा बसेका नग्न व्यक्ति शारीरिक रूपमा निकै कमजोर देखिन्छन्। फिल्मको स्लोगन 'अनेकौं समस्या म देख्छु जगत्मा, छ कि दोष हाम्रो आफ्नै रगतमा' राखिएको छ।
यो तस्बिर भित्तामा फ्रेममा राखिएको जस्तो समेत देखिन्छ।
यो फस्टलुक पोस्टर र राखिएको स्लोगनले राजा होस् वा नागरिक समस्या हरेक व्यक्तिमा छ भन्ने थिममा फिल्म बन्न लागेको संकेत गर्छ।
पोस्टरमा देखिएका दुवै पात्रको भूमिका अभिनेता पल शाहले निभाएका छन्।
छत्रेश्वरी म्यानेजमेन्ट प्रा.लिको ब्यानरमा बिराज बिष्ट प्रस्तुतकर्ता रहेको 'महाराजधिराज' का लेखक तथा निर्देशक परिच्छेद सेन हुन्। बिराजले यसअघि फिल्म ‘बुलाकी’ निर्माण गरेका थिए भने सेनले ‘प्रेमगञ्ज’ निर्देशन गरेका थिए।
फिल्मको निर्मातामा टोपेन्द्र विष्ट, चक्रबहादुर केसी र रवी खड्का छन्। यसको प्रदर्शन मिति समेत घोषणा भइसकेको छ।
फिल्म आउँदो दसैँको फूलपातीमा रिलिज हुने निर्माण टिमले जनाएको छ।
