फिल्म 'रंगी' को पहिलो गीत सार्वजनिक गरिएको छ। आइतबार काठमाडौंमा आयोजित कार्यक्रमकाबीच सार्वजनिक 'छ भने माया' गीतमा आनन्द कार्की र सुजाता केसीको स्वर, दुर्गेश थापाको शब्द, संगीत र एरेन्ज छ।
भिडिओमा फिल्मका प्रमुख कलाकारहरू सलोन बस्नेत, नम्रता श्रेष्ठ, दिलीप रायमाझी, आयुषी ढकाल, विशाल पहारी र उत्तम केसी फिचर्ड छन्। डान्सिङ नम्बरको गीतले मायाको कुरा गरेको छ। यो भिडिओका कोरियोग्राफर कविराज गहतराज हुन्।
गीत रिलिजपछि संगीतकार दुर्गेशले गायक आनन्द कार्कीजस्तो दिग्गज गायकलाई आफ्नो संगीत र शब्दमा समेट्नु आफ्नो लागि चुनौती भएको बताए।
गायक आनन्द कार्कीले दुर्गेशको शब्द र संगीतमा गीत गाउन पाउँदा खुसी लागेको बताए। गायिका सुजाता केसीले आफूलाई सुन्दर गीतमा स्वर दिने अवसर दिएकोमा आभार व्यक्त गरिन्।
फिल्मका प्रस्तुतकर्ता तथा अभिनेता सलोन बस्नेतले आफू अस्ट्रेलियामा रहँदा यो गीत भर्चुअल माध्यममार्फत सुनेको स्मरण गर्दै एउटा राम्रो गीत दर्शकलाई दिन पाएको भन्दै खुसी व्यक्त गरे।
'डेब्यु' नायिका नम्रता श्रेष्ठले आफूलाई विश्वास गरेर फिल्ममा लिएकोमा आभार व्यक्त गरिन्। उनले सामाजिक कथाको फिल्ममा जोडिन पाउनु र डान्सिङ नम्बरको गीतमा काम गर्न पाउनु खुसीको कुरा भएको बताइन्।
फिल्मकी निर्मात्री करिश्मा केसी बस्नेतले फिल्म निर्माणमा पहिलो प्रयासलाई दर्शकले साथ दिनेमा ढुक्क रहेको बताइन्।
'डेब्यु' निर्देशक सुरेश न्यौपानेले ‘रंगी’ सलोन र आफ्नो सोचको परिणाम रहेको बताउँदै दर्शकले सामाजिक कथासँगै हाँसो र रोदनको मिश्रण पाउने बताए।
सान्भी इन्टरटेनमेन्ट प्रालिको व्यानरमा निर्माण भएको फिल्ममा सलोन बस्नेत, नम्रता श्रेष्ठ, दिलीप रायमाझी, आयुषी ढकाल, उत्तम केसी, सुमिन गुरूङ, र विशाल पहारीको अभिनय छ। सक्षम सुवेदी, करिश्मा केसी बस्नेत र अनिश गौतमको निर्माण रहेको फिल्ममा सुमन गजमेरको लेखन, सौरभ लामाको छायांकन, बन्दे प्रसादको सम्पादन छ।
फिल्म आगामी फागुन २ गतेबाट रिलिज हुनेछ। यसलाई एप्पल इन्टरटेनमेन्ट, एफडी र रिच इन्टरटेनमेन्टले वितरण गर्नेछन्।
भिडिओः
