फिल्म 'फेरि रेशम फिलिली' को प्रदर्शन मिति घोषणा गरिएको छ।
रौनक विक्रम कंडेलको लगानीमा निर्माण भएको फिल्म फागुन १४ गतेदेखि प्रदर्शनमा आउने भएको हो।
निर्माताले आइतबार एक पोस्टर सार्वजनिक गर्दै महाशिवरात्रिलाई फिल्मको प्रदर्शन मिति घोषणा गरेका हुन्।
सार्वजनिक पोस्टरमा फिल्मका मुख्य अभिनेता विनय श्रेष्ठ र अभिनेत्री सुपुष्पा भट्ट प्रस्तुत छन्। विनय ९ वर्षअघि प्रदर्शन भएको फिल्म 'रेशम फिलिली' कै लुक्स र गेटअपमा देखिएका छन्। उनी आकाशतिर हेर्दै हात जोडेका छन्।
पोस्टरमा सुपुष्पाले मुस्कुराउँदै हातमा रातो गुलाब लिएकी छन्। सार्वजनिक पोस्टरबाट उनीहरुबीचको प्रेम दर्शाउन खोजिएको छ।
यसअघिको 'रेशम फिलिली' मा विनयको जोडी अभिनेत्री मेनुका प्रधानसँग बाँधिएको थियो। यसपटक फिल्ममा मेनुका दोहोरिएकी छैनन्।
निरोज महर्जनको निर्देशन रहेको फिल्ममा विनय र सुपुष्पासहित नीर शाह, कामेश्वर चौरासिया, प्रकाश घिमिरे, शिशिर वाङ्देल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, प्रकाश घिमिरे, सजन थापा लगायतको अभिनय छ।
वि मोसन पिक्चर्ससँगको सहकार्यमा सिनेमा आर्टको प्रस्तुतिमा फिल्म बनेको हो। निर्देशक महर्जन र आकाश बरालको पटकथा रहेको फिल्मको कार्यकारी निर्मातामा सुरज बम ठकुरी छन्।
सुसन प्रजापतीको छायांकन रहेको फिल्ममा नरेश किंग योगीको द्वन्द्व निर्देशन तथा कालीप्रसाद बाँस्कोटा, एसडी योगी, हर्क साउद, जयन जे वाइवा र दीपक शर्माको संगीत छ।
सह–निर्माताको रूपमा एनी थापा छन्। सुरेन्द्र पौडेलले फिल्म सम्पादन गरिरहेका छन्।
गोविन्द शाहीको काफिया फिल्मस् र कुवेर सिने डिष्ट्रीब्युसनले फिल्म वितरण गर्नेछन्।
