अभिनयमा आधारित रियालिटी शो 'एक्टिङ स्टार' दर्शकमाझ आउने तयारीमा छ। यसका लागि केही महिनाअघि डिजिटल अडिसन आह्वान गरेर प्रतियोगी छनोट हुँदै गरेको शोको हालै जुरीहरू सार्वजनिक गरिएको छ।
यो शोको जुरीमा पाका निर्देशक तथा अभिनेता नीर शाह, अभिनेता अनुप बराल र अभिनेत्री ऋचा शर्मा तय भएका छन्।
डिजिटल अडिसनमा एक हजारभन्दा धेरैले सहभागिता जनाएको निर्माता कम्पनी महक मिडिया नेटवर्कले जनाएको छ। त्यसमध्ये छनोट भएकालाई उनीहरू भएकै स्थानमा पुगेर प्रमाणपत्र प्रदान गरिने भएको छ। बाल, युवा र वृद्ध कलाकारले समेत अडिसनमा सहभागिता जनाएको बताइएको छ।
अभिनय कला प्रस्फुटन गर्ने उद्देश्यले शो ल्याउन लागिएको निर्देशक विशाल भण्डारीले बताए। एपीवान टिभीले यो शो प्रसारण गर्नेछ।
गायन, नृत्य र कमेडीका रियालिटी शोलाई दर्शकले रूचाइरहेका बेला ‘एक्टिङ स्टार’ आउन लागेको हो। यसको डिजिटल अधिकार ओएसआरले खरिद गरेको छ।
विजेताले नगद पुरस्कारसहित फिचर फिल्ममा समेत काम गर्ने अवसर पाउने बताइएको छ।
