अभिनेता केदार घिमिरे (माग्ने बुढा)ले फिल्म 'माग्ने राजा' मा शीर्ष भूमिकामा अभिनय गर्ने भएका छन्।
ऋषि लामिछानेको निर्देशनमा बन्न लागेको फिल्मको मुख्य भूमिकामा केदार अनुबन्धित भएका हुन्।
निर्माण युनिटले एक पोष्टर सार्वजनिक गर्दै फिल्मको नाम र शीर्ष कलाकारबारे जानकारी दिएको हो। मुनाल घिमिरेको निर्माण रहने फिल्मको कथा सामीप्यराज तिमल्सिनाले लेखेका हुन्।
आगामी फागुन १ गतेबाट फिल्मको छायांकन सुरू गर्ने जनाइएको छ। आरम्भ प्रोडक्सनको प्रस्तुति रहने फिल्ममा केदार बाहेक अन्य कलाकार छनौटको क्रममा छन्।
फिल्म कमेडी कथावस्तुमा बन्न लागेको जनाइएको छ।
यो फिल्मबाट निर्देशक लामिछानेले ८ वर्षपछि कमब्याक गर्न लागेका हुन्। उनले निर्देशन गरेको पछिल्लो फिल्म ‘किस्मत २’ सन् २०१६ मा प्रदर्शन भएको थियो।
केदार यतिबेला फिल्म 'जेरी-अन टप' को छायांकनमा छन्। उनले अर्को फिल्म 'माइतीघर' पनि साइन गरिरहेका छन्। त्यस्तै, फिल्म 'कंगारू' मा पनि उनले काम गर्दैछन्।
