मंसिर ७ गते रिलिज हुने फिल्म 'अग्नीदहन' को ट्रेलर सार्वजनिक गरिएको छ।
साहित्यकार तथा पत्रकार लोकमणि पौडेलको उपन्यास 'अग्नीदहन' मा आधारित रहेर तयार पारिएको फिल्मको ट्रेलर बिहीबार सार्वजनिक गरिएको हो।
दुई मिनेट ३६ सेकेण्डको ट्रेलरमा नाँच्दै गरेकी एक महिला अचानक लडेर काप्न थालेपछि उनलाई बोक्सी लागेको भन्दै दिइएको अनेक मानसिक यातनालाई समेटिएको छ।
समाजसेवीको भूमिका निभाएका प्रकाश घिमिरेले 'बोक्सी अन्धविश्वास हो' भनिरहँदा समाजले धामीझाँक्री लगाउन भन्दै उनलाई दिइएको अनेक यातनलाई ट्रेलरमा स्थान दिइएको छ।
बोक्सीको आरोप लगाइएकी महिला प्रमिला तुलाचनले फिल्मकी कलाकार अनुपमा भण्डारीलाई 'अञ्जली म तिमीलाई लिन आएको' भन्दै बोलाउन थालेपछि अनुपमामा देखिएको त्रासलाई ट्रेलरमा देखाइएको छ।
बोक्सीको आरोप लागेपछि महिला कतिसम्म विक्षिप्त हुन्छन् भन्ने कुरा ट्रेलरमा प्रस्तुत गरिएको छ।
फिल्मका निर्देशक घनश्याम लामिछाने हुन्। मान्छे कोही पनि बोक्सी हुँदैन भन्ने सोचलाई देशव्यापी अभियानको रूपमा अगाडि बढाउन फिल्म निर्माण गरिएको उनले बताए। फिल्ममा प्रकाश घिमिरे, प्रमिला तुलाचन, माओत्से गुरूङ, अनुपमा भण्डारी, तुलसी क्षेत्री, विष्णु बास्तोला, डा निर्मल लामिछाने, तारा बहादुर गुरूङ लगायत कलाकारहरूको अभिनय छ।
मान्छे बोक्सी हुन्न कहिल्यै राष्ट्रिय जागरण प्रतिष्ठानले निर्माण गरेको फिल्ममा लोकमणी पौडेलको कथा, पटकथा तथा संवाद, कोविदशरण उपाध्यायको परिकल्पना, परिच्छेद सेनको सहायक निर्देशन, दीर्घ गुरूङको छायांकन, दीर्घ खड्काको सम्पादन, शंकर पाण्डेको प्रोडक्सन डिजाइन छ।
नेपालका निवर्तमान राष्ट्रपति विद्यादेवी भण्डारी, प्रधानमन्त्री केपी शर्मा ओली, निवर्तमान प्रधानमन्त्री पुष्पकमल दाहालले समेत हेरिसकेको यो फिल्मलाई चलचित्र विकास बोर्डले 'विशेष चलचित्र अवार्ड' समेत दिइसकेको छ।
ट्रेलर सार्वजनिक भएसँगै फिल्मले मोफसल प्रचारयात्रा पोखराबाट सुरू गरेको छ।
