एक समयका चर्चित अभिनेता उत्तम प्रधान पछिल्ला वर्ष फिल्ममा सक्रिय छैनन्।
उनी पछिल्लो समय 'दर्पणछाया २' फिल्ममा विशेष भूमिकामा देखिएका थिए।
केही समयअघि मात्र उनले अभिनेत्री निरूता सिंहसँग एक म्युजिक भिडिओमा अभिनय गरेका थिए। अब भने उनले फिल्ममा कमब्याक गर्ने भएका छन्। उनले हालै फिल्म 'कल्ली' साइन गरेका हुन्।
रेड बर्ड प्रोडक्सन र कस्तुरी प्रोडक्सनको ब्यानरमा निर्माण हुने फिल्ममा सौगात मल्ल, अर्पण थापा, बुद्धि तामाङ, कमलमणि नेपाल र बेनिशा हमाल यसअघि अनुबन्धित भइसकेका छन्।
फिल्मका निर्माता किरण नेपाली र लेखक तथा निर्देशक लक्ष्मण सुनारले सिक्किम पुगेर अभिनेता उत्तम प्रधानलाई फिल्ममा अनुबन्धित गरेका हुन्। प्रधानले लामो समयपछि नेपाली फिल्ममा कमब्याक गर्न पाउँदा आफू उत्साहित भएको प्रतिक्रिया दिए। फिल्ममा उत्तमको भूमिका के हुने भन्ने निर्माण पक्षले खुलाएको छैन।
फिल्ममा महेश दवाडीको पटकथा तथा संवाद रहनेछ। यो फिल्म नयाँ वर्ष २०८२ को छेको पारेर चैतको २९ गते रिलिज हुने जनाइएको छ।
फिल्मको छायांकन कर्णाली प्रदेशका विभिन्न रमणीय स्थानमा गर्ने तयारी भइरहेको निर्देशक सुनारले जानकारी दिए।
