प्रकाश सपुतको व्यस्तता हिजोआज संगीत भन्दा फिल्ममा बढी छ।
एकातर्फ उनी अभिनीत फिल्म 'पूर्ण बहादुरको सारंगी' ले आक्रामक व्यापार गरिरहेको छ। प्रकाश सिनेमा हलमा पुगेर दर्शकसँग खुसी साटिरहेका छन्।
अर्कोतर्फ, प्रकाश आफैले फिल्म 'वसन्त' निर्देशन गरिरहेका छन्। बागलुङ, काठमाडौंसहित तराईका जिल्लामा फिल्मको छायांकन गरिएको छ। र, अझै केही भाग छायांकन बाँकी छ।
यसैबीच यतिबेला फिल्म 'वसन्त’ लाई लिएर नयाँ खबर प्राप्त भएको छ।
यो फिल्ममा अर्का अभिनेता दिलीप रायमाझीलाई पनि दर्शकले देख्न पाउने भएका छन्।
प्रकाशले दिलीपसँग यसअघि फिल्म 'परदेशी २' र म्युजिक भिडिओमा समेत सहकार्य गरेका थिए।
'वसन्त' मा दिलीपको अभिनय रहनेबारे निर्माण पक्षले भने केही खुलाएको छैन। स्रोतका अनुसार दिलीपको भूमिका छोटो रहेको र उनले तिहारअघि वीरगञ्ज पुगेर आफ्नो भागको छायांकन सकेका छन्।
गलबन्दी प्रोडक्सनको प्रस्तुति रहेको ‘वसन्त’ मा प्रकाश सपुत, स्वस्तिमा खड्का, प्रभात पाल ठकुरी, खड्क बहादुर पुन, शिभान्सी श्री, अनुप बराल, प्रकाश घिमिरे, कमलमणी नेपाल लगायतको अभिनय रहनेछ।
फिल्मको कथा र संगीत पनि प्रकाशकै हुनेछ। कार्यकारी निर्मातामा मोहन विश्वकर्मा, अनुरोध भट्टराई र नाना थकाली छन्।
फिल्मको प्रदर्शन मिति चैत २२ गते (चैते दसैं) का लागि तय छ।
