लक्ष्मीपूजाको अवसर पारेर बिहीबारदेखि प्रदर्शनमा आउने फिल्म 'पूर्ण बहादुरको सारंगी' को अग्रिम टिकट बिक्री खुला भएको छ।
हलले विजय बराल र प्रकाश सपुत अभिनीत यो फिल्मको शो तालिका तय गर्दै टिकट बिक्री खुलाएका हुन्।
देशको सबैभन्दा ठूलो मल्टिप्लेक्स क्युएफएक्स चेनले काठमाडौं उपत्यकाभित्र यो फिल्मलाई पहिलो दिनका लागि १९ शो उपलब्ध गराएको छ। काठमाडौंबाहिर २१ शो दिइएको छ।
आईएनआई सिनेमाजले ९ शो दिएको छ। त्यस्तै बिग मुभिज र एफक्युब सिनेमाजले फिल्मलाई ३–३ शो उपलब्ध गराएका छन्। सीडीसी सिनेमाजले ५ शो दिएको छ। कतिपय हलले बुकिङ खुलाउने तयारी गरेका छन्।
'पूर्ण बहादुरको सारंगी' मा विजय र प्रकाशसहित अञ्जना बराईली, मुकुन भुसाल, बुद्धि तामाङ, माओत्से गुरूङ लगायत कलाकारहरूको अभिनय छ।
सरोज पौडेलको लेखन तथा निर्देशन रहेको फिल्मले सारंगी बजाएर जीविकोपार्जन गर्ने परिवारको कथा प्रस्तुत गरेको छ। फिल्मको निर्माता विनोद पौडेल र प्याट्रिक सुवेदी हुन्।
यो साता रिलिजमा नेपाली फिल्म एउटा मात्रै भए पनि हलमा दसैंमा रिलिज फिल्मको दबदबा भने कायमै छ। '१२ गाउँ' र 'छक्का पञ्जा ५' अहिले पनि राम्रो शो र अकुपेन्सीसहित प्रदर्शन भइरहेका छन्।
