दोस्रो सातामा प्रदर्शनरत फिल्म 'ज्वाइँ साब' को गीत 'कुहिरोको दरबार' लाई युट्युबमा सार्वजनिक गरिएको छ।
यसको भिडिओमा फिल्मका कलाकार जितु नेपाल, निती शाह, बुद्धि तामाङ र हिमेश पन्त फिचर्ड छन्। तीनजना कलाकारको यात्रालाई भिडिओमा चित्रण गरिएको छ। त्यसक्रममा जितु नीतिको कल्पनामा डुबेको देखाइएको छ।
सोमबार ओएसआर डिजिटलको युट्युबमा सार्वजनिक गीतमा जनक ताम्राकार र महेश ताम्राकारको स्वर छ। यसका शब्द हर्क साउदका हुन् भने महेश ताम्राकारको संगीत सुन्न सकिन्छ।
बसन्त निरौलाको निर्देशनमा बनेको ‘ज्वाइँ साब’ ले दोस्रो साताको शनिबारसम्म ३ करोड २५ लाख रूपैयाँ ग्रस कलेक्सन गरेको जनाइएको छ।
राजकुमार पण्डित प्रस्तुतकर्ता रहेको फिल्मको निर्मातामा समिर पण्डित, सौगात पण्डित र पदमलाल तामाङ छन्। सबिन अधिकारीको कथा रहेको फिल्मलाई शंकर धितालले लेखेका हुन्।
फिल्म दसैं फूलपातीको अवसर पारेर 'छक्का पञ्जा ५' र '१२ गाउँ' सँग एकसाथ रिलिज भएको थियो।
