केपी ओली कप: क्षमताभन्दा बढी पास बाँडियो, रंगशाला अस्तव्यस्त (तस्बिरहरू)

नवीनबाबु गुरूङ

काठमाडौं, फागुन १९

केपी ओली कप फुटबल प्रतियोगिताको उपाधिका लागि आज साँझ दशरथ रंगशाला मछिन्द्र एफसी र त्रिभुवन आर्मी क्लब भिड्दैछन्।

साँझ ६ बजेदेखि फाइनल सुरू हुने भए पनि १ बजेदेखि नै रंगशालामा दर्शक प्रवेश गराइएको थियो। आयोजक नेकपा एमालेको भ्रातृ संस्था राष्ट्रिय युवा संघ नेपालले ३ बजेदेखि समापन समारोह गर्ने घोषणा गरेको थियो।

तर फाइनल खेलअघि रंगशालामा दर्शक प्रवेश अस्तव्यस्त बनेको छ। खेल सुरू हुनुभन्दा दुई घन्टाअघि नै रंगशाला सिट भरिँदा पास र टिकट भएका कतिपय दर्शक रंगशाला बाहिर रोकिएका छन्।

अफिसियललाई समेत भित्र पस्न कठिन परेको छ। क्षमताभन्दा बढी पास वितरण गर्दा अहिले रंगशाला बाहिरको क्षेत्र अस्तव्यस्त बनेको छ भने प्रहरीलाई भिड नियन्त्रणमा लिन हम्मेहम्मे परेको छ।

कतिपय दर्शक भिडलाई छिचोलेर बल्लतल्ल भित्र प्रवेश गरेका छन्।

फाइनल खेलमा विश्वचर्चित फुटबल खेलाडी इटलीका लिजेण्ड गोलकिपर जियानलुइजी बुफोन प्रमुख अतिथिको रूपमा रहनेछन्। कुमा सागर, पूर्ण राईको पनि प्रस्तुति रहने बताइएको छ।

प्रतियोगिताको विजेतालाई १५ लाख ११ हजार एक सय ११ रुपैयाँ र उपविजेतालाई ५ लाख रुपैयाँसहित ट्रफी, प्रमाणपत्र र मेडल प्रदान गरिने छ।

सर्वोत्कृष्ट खेलाडीले एक लाख, उत्कृष्ट गोलरक्षक, गोलकर्ता र उदीयमान खेलाडीले समान ५० हजार रुपैयाँ पाउनेछन्। प्रतियोगितामा दुई विदेशीसहित ९ टोलीले सहभागिता जनाएका थिए।