अखिल नेपाल फुटबल संघ (एन्फा) को आगामी चार वर्षको कार्यकालका लागि भोलि सोमबार केन्द्रीय कार्यसमितिको निर्वाचन हुँदैछ।
निर्वाचनमा हालका अध्यक्ष कर्माछिरिङ शेर्पा र वरिष्ठ उपाध्यक्ष पंकजबिक्रम नेम्बाङको प्यानलबीच मुख्य प्रतिस्पर्धा हुने देखिएको छ।
अध्यक्षमा कर्माछिरिङ र पंकजबिक्रमसहित राजीवराज पौडेल पनि प्रतिस्पर्धामा छन्। पौडेलले भने प्यानल बनाएका छैनन्।
एक वरिष्ठ उपाध्यक्ष र चार जना उपाध्यक्षका लागि शेर्पा र नेम्बाङ प्यानलबाट छुट्टाछुट्टै उम्मेदवारी परेको छ।
वरिष्ठ उपाध्यक्षमा शेर्पा प्यानलबाट शिक्षित पराजुली र नेम्बाङ प्यानलबाट वीरबहादुर खड्का प्रतिस्पर्धा गर्दैछन्।
यस्तै उपाध्यक्षमा शेर्पा पक्षबाट उपेन्द्रमान सिंह, दीर्घबहादुर केसी, रत्नकुमार श्रेष्ठ र विज्ञानराज शर्मा उम्मेदवार छन्।
नेम्बाङ पक्षबाट विराटजंग शाही, दावा लामा, सुन्दरनरसिंह जोशी र दीपक खतिवडा उपाध्यक्षको उम्मेदवार छन्।
२१ सदस्यीय कार्यसमितिमा १५ जना सदस्य हुनेछन्। १५ सदस्य मध्ये १३ जना खुल्ला र २ जना महिला सदस्यका लागि पनि दुवै प्यानलेबाट उम्मेदवार छन्।
निर्वाचनमा ७ प्रदेशमध्ये प्रदेश १ एकका सबैले नेम्बाङलाई भोट दिने सार्वजनिक रूपमै घोषणा गरेका थिए। यस्तै सी डिभिजन क्लबका मताधिकार पाएका व्यक्ति पनि नेम्बाङ पक्षका खुलेका छन्। सी डिभिजनको ९ मध्ये ७ भोट नेम्बाङ पक्षलाई जाने सी डिभिजनका एक प्रतिनिधिले दाबी गरेका छन्।
बाँकी प्रदेशमा भने दुवै पक्षबीच तीव्र प्रतिस्पर्धा रहेको बताइएको छ। यस्तै ए र बी डिभिजन लिगमा पनि दुई पक्षको अन्तर खासै देखिदैन।
यसपटकको एन्फा निर्वाचनमा ८४ जनाले मताधिकार पाएका छन्। निर्वाचनमा ४५ जिल्लाले मताधिकार पाउने भए पनि यसपटक ४२ जिल्लाले मात्र मत हाल्दैछन्।
भक्तपुर र सिन्धुलीको जिल्ला निर्वाचनमा विवाद हुँदा मताधिकारबाट बन्चित भएका थिए। यस्तै एन्फाको विधानविपरित मताधिकार दिइएको बन्दै दाबीविरोध परेपछि सिराहा जिल्लाको मताधिकार बदर भएको थियो।
निर्वाचनमा १४ वटा ए डिभिजन क्लब, ११ वटा बी डिभिजन क्लब र ९ वटा सी डिभिजन क्लबले मत खसाल्नेछन्। यसैगरी राष्ट्रिय लिगमा छनोट भएका मोफसलका ४ वटा क्लबले मत दिनेछन्। एन्फाअन्तर्गतको महिला संघ, खेलाडी संघ, प्रशिक्षक संघ र रेफ्री संघले पनि मत दिनेछन्।
सम्बन्धित समाचारहरू :-
किन तेस्रोपटक एन्फा अध्यक्षमा भिड्दैछन् कर्माछिरिङ?
एन्फा राजनीतिको २० वर्षपछि अध्यक्षका प्रत्यासी बनेका नेम्बाङ
नेपाली फुटबल र स्वार्थको राजनीति
अलमुताइरीले राष्ट्रिय टिमको प्रशिक्षकमा निरन्तरता पाउलान्?
एन्फा निर्वाचन : क्लब र जिल्लालाई कहिलेसम्म भोटका लागि मात्र प्रयोग गर्ने?
