रोनाल्डो बिनै खेलेको रियल मड्रिड तेस्रो स्थानमा उक्लियो


मालागालाई हराउँदै रियल मड्रिड स्पेनिस ला लिगा फुटबलको तेस्रो स्थानमा उक्लिएको छ। लिग अन्तर्गत गए राति भएको खेलमा मालागालाई २–१ ले हराउँदै रियल मड्रिड तेस्रो स्थानमा उक्लिएको हो।

स्टार स्ट्राइकर क्रिष्टियानो रोनाल्डो, ग्यारेथ बेलसहितका खेलाडीलाई आराम दिएको खेलमा रियललाई जिताउन इस्को र कास्मेइरोले गोल गरे। यस्तै मालागाका लागि डिएगो रोलानले एक गोल फर्काए।

खेलको २९ औँ मिनेटमा इस्कोले फ्रि–किक मार्फत गोल गर्दै सुरुवाति अग्रता दिलाएका थिए। पहिलो हाफ १-० ले अगाडि रहेको रियलका लागि ६३ औं मिनेटमा कास्मेइरोले गोल गर्दै अग्रता दोब्बर पारे। इन्जुरी समयको तेस्रो मिनेटमा रोलानले मालागका लागि एक गोल फर्काएका थिए।

जितपछि तेस्रो स्थानमा फर्किएको रियलको ६ खेल बाँकी हुँदा ६७ अंक भएको छ । उ दोस्रो स्थानको एथ्लेटिको मड्रिड भन्दा चार तथा शीर्ष स्थानको बार्सिलोना भन्दा १५ अंकले पछि रहेको छ ।

Share:

© 2017 Setopati Sanchar Pvt. Ltd.