दोस्रो लेगमा एथ्लेटिको मड्रिडलाई ३ – १ ले हराउँदै सेभिया स्पेनिस कोपा डेल रे फुटबलको सेमिफाइनलमा प्रवेश गरेको छ। सेभिया क्वाटरफाइनलकाे दुई खेलमा ५ – २ को जितसहित सेमिफाइनलमा पुगेको हो।
मंगलबार राति घरेलु मैदानमा भएको खेलमा सेभियालाई जित दिलाउन सर्जियो स्कुडेरो, इभर बेनेगा र पाब्लो सर्बियाले एकएक गोल गरे। एथ्लेटिको मड्रिडका एन्टोनी ग्रीजम्यानले एक गोल फर्काए। एथ्लेटिकोविरुद्ध सेभियाले पहिलो मिनेटमा नै सुरुवाती अग्रता लिएको थियो। स्कुडेरोले पहिलो मिनेटमा गोल गर्दै सेभियालाई १ – ० को अग्रता दिलाए।तर खेलको १३ औं मिनेटमा ग्रीजम्यानले गोल गर्दै एथ्लेटिकोलाई खेलमा फर्काए।
पहिलो हाफ १ – १ गोलको बराबरीमा सकिएको खेलको दोस्रो हाफमा सेभियाले दुई गोल गर्दै सहज जित निकाल्यो। खेलको ४८ औं मिनेटमा बेनेगाले पेनाल्टीमा गोल गर्दै सेभियालाई २ – १ को अग्रता दिलाए। यसपछि खेलको ७९ औं मिनेटमा सर्बियाले गोल गर्दै सेभियालाई ३ – १ को जित दिलाए।
यसअघि एथ्लेटिको मड्रिडको मैदानमा भएको पहिलो लेगमा सेभिया २ – १ ले विजयी भएको थियो।
