सिद्धार्थ बैंक नेपाल प्रिमियर लिग (एनपिएल) मा जनकपुर बोल्ट्सका मध्यक्रमका ब्याटर जिमी निशमले १८ बलमै अर्धशतक प्रहार गरेका छन्।
उनले चितवन राइनोजविरूद्धको खेलमा अर्धशतक पूरा गर्ने क्रममा ४ चौका र ५ छक्का प्रहार गरे। निशमको १५औं ओभरको पहिलो बलमा सोहिल तन्विरको बलमा क्याच भएका थिए। तर सो बल नो बल भएको थियो। त्यतिबेला निशमले ५८ रन जोडेका थिए। त्यसपछिको फ्रि हिटमा छक्का प्रहार गरेका निशम चौथो बलमा भने आउट भए। उनले २४ बलमा ५ चौका र ६ छक्काको मद्दतमा ६५ रन जोडे। उनी आउट हुँदा चितवनले ८ विकेट गुमाइसकेको थियो।
यसअघि पोखरा एभेन्जर्सका आन्द्रेस गौसले लुम्बिनीविरूद्ध शतक पूरा गरेको खेलमा २० बलमा ५० रन कटाएका थिए। जसका कारण निशमको यो एनपिएलकै छिटो अर्धशतक हो।
त्यसअघि चितवन राइनोजले कप्तान कुशल मल्ल र रवी बोपाराको उत्कृष्ट ब्याटिङमा जनकपुर बोल्ट्सलाई १८१ रनको लक्ष्य थियो। जसमा जनकपुरले ६ विकेट गुमाइसकेको छ।
टस जितेर पहिले ब्याटिङ गरेको चितवनले ५ विकेटको क्षतिमा १८० रन जोड्यो।
कप्तान कुशलले ७२ रनको योगदान गरे। १९औं ओभरमा जिमी निशमको बलमा अनिलकुमार साहबाट क्याच हुनुअघि उनले ४१ बलमा ३ चौका र ७ छक्का प्रहार गरे। १७औं ओभरमा निशमकै बलमा आसिफ शेखले क्याच छाड्दा कुशलले ५३ रनमा जीवनदान पाएका थिए।
कुशलले चौथो विकेटका लागि रवी बोपारासँग ११३ रनको साझेदारी गरे। जसका कारण चितवनको स्कोर बढेको थियो। बोपाराले अन्तिम ओभरको दोस्रो बलमा ललितनारायण राजवंशीको बलमा क्याच हुनुअघि ४४ रन जोडे। उनले ३२ बलमा ५ चौका र १ छक्का प्रहार गरे।
त्यसअघि ओपनर हसन इशाखिलले १९ बलमा २८ रन जोडे। आठौं ओभरमा जनकपुरका हर्ष थाकरको बलमा स्टमपिन हुनुअघि उनले ४ चौका र १ छक्का प्रहार गरे। अर्का ओपनर विपिन रावल ३ रनमा आउट भए भने सन्तोष कार्कीले १२ बलमा १४ रन बनाए।
बलिङमा जनकपुरका ललितनारायण राजवंशीले उत्कृष्ट बलिङ गरे पनि अरु बलर चल्न सकेनन्। राजवंशीले आफ्नो स्पेलको सुरूवाती दुई ओभर मेडन राखे। राजवंशीले २ विकेट लिँदा ११ रन खर्चिए। जारी प्रतियोगितामा सर्वाधिक विकेट लिने सूचीको शीर्ष स्थानमा रहेका राजवंशीले कुल १३ विकेट लिइसकेका छन्। ललितबाहेक खेलमा हर्ष थाकर, मोहमद मोहसिन र जिमी निशमले १-१ विकेट लिए।
६ खेलबाट १० अंक जोडेको जनकपुर यसअघि नै प्लेअफमा पुगिसकेको छ। आजको खेलमा जित निकाले जनकपुरको शीर्ष दुई स्थान पक्का हुनेछ भने पहिलो क्वालिफायर खेल्नेछ।
चितवनले जित निकालेको अवस्थामा प्लेअफ जित्ने सम्भावना बलियो हुनेछ। चितवनको जितले दुई टोली लिग चरणबाट बाहिरिनेछन्। छैटौं स्थानको विराटनगर किंग्स र सातौं स्थानको पोखरा एभेन्जर्स लिग चरणको अन्तिम खेलअघि बाहिरिनेछन्।
चितवन पराजित भएमा भने चितवनसहित विराटनगर र पोखराको अन्तिम खेलसम्म समिकरणका लागि कुर्नुपर्नेछ।
