मलेसियामा हुने दसौं पारा तेक्वान्दो च्याम्पियनसिपमा प्रतिस्पर्धा गर्ने नेपाली पारा तेक्वान्दो टोलीलाई काठमाडौं जिल्ला तेक्वान्दो संघले बिदाइ गरेको छ।
मलेसियाको सारवाक सहरमा आगामी अगस्ट १ मा हुने च्याम्पियनसिपमा नेपालका पाँच जना पारा तेक्वान्दो खेलाडीले प्रतिस्पर्धा गर्दैछन्।
ठमेलमा शनिबार आयोजना भएको एक कार्यक्रमबीच काठमाडौं जिल्ला तेक्वान्दो संघले नेपाली खेलाडीलाई बिदाइ गरेको हो। नेपाल चेम्बर अफ कमर्स शिक्षा तथा खेलकुद समितिका अध्यक्ष रूपक राजवंशी, उपाध्यक्ष सुनिता सिंह, नेपाल तेक्वान्दो संघ काठमाडौँ जिल्लाका विक्रम खड्गी र नेपाल तेक्वान्दो संघका केन्द्रीय सदस्य कुमार लामा घिसिङलगायतले नेपाली टोलीलाई बिदाइ गरेका हुन्।
सोही अवसरमा सिद्धार्थ वनस्थलीका प्रिन्सिपलसमेत रहेका रूपक राजवंशीले पारालिम्पिकमा पदक विजेता पलेशा गोवर्धनलाई सम्मान गर्न पाएको स्मरण गर्दै यस च्याम्पियनसिपमा पदक जित्ने आशा व्यक्त गरे।
साथै उनले पारा तेक्वान्दो टोलीका लागि प्रोत्साहन स्वरूप ५० हजार रुपैयाँ प्रदान गर्ने घोषणा गर्दै खेलकुद क्षेत्रमा जोडिन पाउँदा धेरै खुसी लागेको र आगामी दिनमा पनि पारा तेक्वान्दोलाई सहयोग गर्ने विश्वास व्यक्त गरेका छन्।
काठमाडौं जिल्ला काठमाडौँ संघका अध्यक्ष विक्रम खड्गीले खेलाडीको प्रोत्साहनका लागि यस किसिमको कार्यक्रममा आयोजना गरेको उल्लेख गर्दै उनीहरूलाई सहयोग गर्नका लागि जिल्ला तेक्वान्दो संघ सदैव तयार रहेको विश्वास व्यक्त गरे।
सोही अवसरमा लायन्स क्लब अफ तेक्वान्दो काठमाडौँ नेपाल, लायन्स क्लब अफ काठमाडौं मेरीगोल्ड र तेक्वान्दोकी पूर्वखेलाडी सुमी परियारले ६ खेलाडी, टोलीका प्रशिक्षक कविराज नेगी लामा र व्यवस्थापक रामचन्द्र श्रेष्ठलाई ट्य्राकसुट प्रदान गरेका थिए। टोली आगामी साउन १३ गते त्यसतर्फ प्रस्थान गर्ने कार्यक्रम छ।
उक्त च्याम्पियनसिपमा पेरिस पारालम्पिककी कांस्य पदक विजेता पलेसा गोवर्धन, अमीर ब्लोन, कामना प्रसाईं, रेणु तामाङ र भरत सिंह महताले प्रतिस्पर्धा गर्दैछन्।
के–४४ विधाअन्तर्गत पलेशाले ५७ केजी मुनि, अमिरले ६३ केजीमुनि, रेणु र कामनाले ४७ केजीमुनि तथा भरतले ५८ केजीमुनि तौल समूहमा प्रतिस्पर्धा गर्नेछन्। पलेशा चीनमा अध्ययनरत भएकाले उतैबाट प्रतियोगितामा सहभागी हुने कार्यक्रम छ।
प्रशिक्षक नेगी लामाले वैशाखदेखि नै प्रशिक्षण गरिरहेको र तयारी पनि राम्रो भएकाले पदक जित्ने आशा व्यक्त गरे। उनले एशियन गेम्स र पारालिम्पिकको तयारीका लागि यस च्याम्पियनसिप महत्वपूर्ण रहेको र वरीयता सुधार गर्न पनि यो महत्वपूर्ण हुने उल्लेख गरे।
नेपालले सन् २०१४ देखि एसियन च्याम्पियनसिपमा नियमित प्रतिस्पर्धा गर्दै आएको छ।
हालसम्म नेपालले एशियन च्याम्पियनसिपमा एक रजत र पाँच कांस्य पदक जितेको छ। रञ्जना धामीले रजत र काश्य जितेकी छन्। पलेशा, अरुण शाक्य, सीता भण्डारी र रोहितहाङ राईले काश्य प्राप्त गरेका छन्। प्रशिक्षक नेगीले सन् २०१७ देखि टोली सम्हाल्दै आएका छन्। —न्युज एजेन्सी नेपाल
-1746009348.jpg)
