हरेक प्रकारका खेलाडी उत्पादन र खेलकुद गतिविधिका हिसाबले रूपन्देही लुम्बिनी प्रदेशमा मात्र होइन देशका अरू जिल्लाहरूको तुलनामा अगाडि नै छ।
यहाँ नियमित रूपमा भलिबल, क्रिकेट, फुटबल, ब्याडमिन्टन, लन टेनिस लगायतका खेलहरूको प्रतियोगिता सञ्चालन भइरहन्छ। नियमित रूपमा प्रतियोगिता हुने भएकोले यी खेलहरूप्रति खेलाडीको आकर्षण बढ्दै गएको देखिन्छ।
भलिबल, क्रिकेट, फुटबल लगायतका खेलहरूमा बालबालिका र युवाहरूको जति आकर्षण बढ्दै गएको छ, ब्याडमिन्टन र लन टेनिसप्रति बालबालिका र युवाहरूको मात्र होइन वयस्कहरूको समेत आकर्षण छ।
क्रिकेट, फुटबल र भलिबलमा राष्ट्रिय स्तरका खेलाडी उत्पादन गरेको रूपन्देहीले ब्याडमिन्टन र लन टेनिसमा पनि राष्ट्रिय खेलाडीहरू उत्पादन गरिरहेको छ।
खेलाडीहरूको उत्पादन र आकर्षण बढेपछि रूपन्देहीमा सरकारी र निजी लगानीमा समेत खेलकुद क्षेत्रका साना ठूला गरी दर्जनौं पूर्वाधारहरू निर्माण भइरहेका छन्।
सोही क्रममा बुटवल उपमहानगरपालिका वडा नं. १२ तामनगरमा सुविधा सम्पन्न ब्याडमिन्टन कभर्ड हल निर्माण हुने भएको छ।
खेलकुद पूर्वाधारको विस्तार गर्दै खेल पर्यटनलाई प्रोत्साहन गर्ने उद्देश्यसहित तामनगर ब्याडमिन्टन क्लबको अगुवाइमा कभर्ड हल निर्माण गर्न लागिएको हो।
त्यसका लागि आवश्यक सम्पूर्ण तयारी पूरा गरी प्रक्रिया अघि बढाइएको र सङ्घीय सरकारले अन्तर्राष्ट्रिय स्तरको ब्याडमिन्टन कभर्ड हल निर्माणका लागि यस वर्ष ३ करोड बजेट विनियोजन गरिसकेको छ।
हाल कभर्ड हल निर्माण हुने जग्गाको भोगाधिकार प्राप्तिका लागि प्रक्रिया अगाडि बढेको र भोगाधिकार प्राप्तिपछि भौतिक पूर्वाधार निर्माणको काम सुरू गरिने क्लबका अध्यक्ष सुभास कर्माचार्यले जानकारी दिए।
कभर्ड हल निर्माणको लागि यसअघि पनि प्रदेश सरकार र बुटवल उपमहानगरपालिकाले बजेट विनियोजन गर्दै आए पनि जग्गाको भोगाधिकार प्राप्त नहुँदा बजेट फ्रिज हुँदै गएको छ।
बुटवल उपमहानगरपालिकाले २०७९/८० मा विनियोजन गरेको १० लाख रुपैयाँबाट कम्पाउन्डवाल निर्माण र २०८०/८१ मा विनियोजन गरिएको सात लाख रुपैयाँ बजेटबाट डिपिआर तयार गरिएको थियो। तर, त्यसअघि र पछि समेत गरी उपमहानगरपालिकाले विनियोजन गरेको ३२ लाख र लुम्बिनी प्रदेश सरकारबाट विनियोजित १५ लाख रुपैयाँ भने जग्गाको भोगाधिकार नभएको भन्दै फिर्ता गएको हो।
यस पटक भने संघीय सरकारले ३ करोड रुपैयाँ विनियोजन गरिसकेकोले उक्त रकम फिर्ता नजाने गरी जग्गाको भोगाधिकार प्राप्तिको काम अगाडि बढेको र छिट्टै नै प्रक्रिया पूरा गरी भोगाधिकार प्राप्त हुने वडा नं. १२ का वडाध्यक्ष डिल्लीप्रसाद शर्माले बताए।
शर्माले अहिले जग्गा नाप जाँचको काम भइरहेको र फिल्ड बुक तयार गरी भोगाधिकारको विषय टुङ्ग्याएपछि भौतिक पूर्वाधार निर्माण सुरू हुने जानकारी दिए।
पूर्व वडाअध्यक्ष दुर्गाप्रसाद सुवेदीले कभर्ड हलको परियोजनालाई वडाबासीको गौरवको योजनाको रूपमा अगाडि बढाउन सहयोग गर्नुपर्ने बताए।
भूपू सैनिक कल्याणकारी क्लब तामनगरका अध्यक्ष पुरन बहादुर शाहीले स्थानीय सरकारदेखि सङ्घसम्मको सहकार्यमा निर्माण हुने कभर्ड हलले बुटवलको खेल पर्यटनमा समेत ठूलो टेवा पुग्ने बताए।
क्लबका अध्यक्ष कर्माचार्यका अनुसार सात कट्ठा क्षेत्रफलमा निर्माण हुने कभर्ड हलको विस्तृत परियोजना प्रतिवेदन (डिपिआर) अनुसार कभर्ड हल निर्माणका लागि ६ करोड ६५ लाख ७६ हजार ८४४ रुपैयाँ लागत अनुमान गरिएको छ।
डिपिआर अनुसार कभर्ड हलभित्र प्रतियोगिताका लागि सुविधा सम्पन्न हल, खेलाडीहरूको ड्रेस चेन्जिङ रूम, टाढाबाट आएका खेलाडीहरूलाई बस्नको लागि आवास लगायत कभर्ड हलमा हुनुपर्ने अन्तर्राष्ट्रिय मापदण्डका सबै संरचना निर्माण हुनेछन्।
स्थानीय खेल प्रेमी युवाहरूको सक्रियतामा २०६९ सालमा गठन भएको तामनगर ब्याडमिन्टन क्लबलाई २०७२ सालमा आधिकारिक रूपमा दर्ता गरी सञ्चालन गरिएको हो। क्लबमा हाल २६ जना आजीवन र २४ जना साधारण सदस्य गरी ५० जना सदस्य रहेका छन्।
सोही क्लबको अग्रसरतामा निर्माण हुने अन्तर्राष्ट्रिय ब्याडमिन्टन कभर्ड हलले बुटवलमा खेलकुदको विकास मात्र हैन, पर्यटन र आर्थिक गतिविधिमा समेत सकारात्मक प्रभाव पार्ने अपेक्षा गरिएको छ।
खेलकुद पूर्वाधारको अभाव झेल्दै आएको बुटवलमा कभर्ड हलको निर्माणपछि अन्तर्राष्ट्रिय स्तरका प्रतियोगिताहरू सञ्चालन गर्न सकिने छ।
-1746009348.jpg)
