दाङको तुलसीपुरमा आयोजित प्रथम राष्ट्रिय खुला पुरूष प्रतियोगिताको उपाधि नेपाल आर्मी क्लबले जितेको छ।
जिल्ला खो-खो संघ दाङले जिल्लामा पहिलो पटक आयोजना गरेको प्रथम खुला पुरूष प्रतियोगिता अन्तर्गत आइतबार बिहान भएको फाइनल खेलमा नेपाल आर्मी क्लबले लुम्बिनी प्रदेशलाई २०–१६ को अन्तरले पछाडि पार्दै उपाधि जितेको हो।
उपाधि विजेता आर्मीले नगद ५० हजार पुरस्कार, ट्रफी र प्रमाणपत्र प्राप्त गरेको छ।
वैशाख २६ गतेदेखि २८ गतेसम्म तुलसीपुुरको अरणिको मैदामा आयोजित प्रतियोगितामा लुम्बिनी प्रदेश उपविजेता बन्यो। उसले २५ हजार पुरस्कार, ट्रफी र प्रमाणपत्र प्राप्त गरेको छ।
त्यस्तै सुदूरपश्चिम प्रदेश तृतीय बन्यो।
उसले दश हजार पुरस्कार, ट्रफी र प्रमाण पत्र प्राप्त गरेको छ।
व्यक्तिगत विधातर्फ दाङ तुलसीपुर घर भएका नेपाल आर्मीका बेदबहादुर वली बेष्ट प्लेयर घोषित हुँदा आर्मी कै बिष्णु थारु बेष्ट अट्याकर घोषित भए।
त्यस्तै लुम्बिनी प्रदेशका विकास बिक बेष्ट डिफेन्डर घोषित भए।
गत हिउँदमा भारतमा भएको विश्व खो-खो प्रतियोगितामा नेपाली पुरूष टिमलाई उपविजेता बनाउन महत्वपूर्ण भूमिका खेलेको भन्दै तुलसीपुरका बेदबहादुर वलीलाई नगद दश हजार रकमसहित सम्मान गरेको थियो। त्यस्तै सोही प्रतियोगितामा नेपाली महिला टिमपनि उपविजेता बनेको थियो। महिला टिमकी प्रशिक्षक तुलसीपुरकी उषा कुँवरलाई पनि सम्मान गरिएको थियो।
दाङले आयोजना गरेको प्रतियोगितामा सात वटा प्रदेशका टिम र एउटा विभागीय टिम नेपाल आर्मीको सहभागी थिए।
लिगकम नकआउट सिष्टमबाट खेल खेलाइएको थियो।
दाङ जिल्ला खो-खो संघका जिल्ला अध्यक्ष बालकृष्ण शाहले राष्ट्रिय प्रतियोगिता सकिएको वैशाख २९ गते नेपाल र भारतका बीच प्रतिस्पर्धा हुने बताए।
भारतको एउटा टिम र नेपालका दुई टीमका बीचमा प्रतियोगिता हुने भएको छ। भारत संगको प्रतिस्पर्धाका लागि नेपाली दुई टिमको आइतबार नै छनोट गर्ने भएको छ। भारतीय खेलाडीहरू तुलसीपुर आइसकेका छन्।
