चीनसँग सडक सञ्जालले जोडियो ओलाङचुंगोला


छिमेकीमुलुक चीन र पूर्वी नेपालको ओलाङचुंगोला सडक सञ्जालले जोडिएको छ । सात महिना अघिदेखि नेपाल र चीनको सीमा क्षेत्र टिपतालाबाट निर्माण सुरु गरिएको सडक निर्माणकार्य ताप्लेजुङको ओलाङचुंगोला बस्तीसम्म आइपुगेपछि चीन र ओलाङचुंगोला सडक सञ्जालले जोडिएको हो ।

शुक्रबार चिनियाँ ड्राइभर स्काभेटरलगायतका मेसिनसहित ट्र्याक खोलेर ड्राइभर बस्तीमा आइपुगेपछि स्थानीयवासी हर्षित भएका छन् । जिल्लाको सबै भन्दा विकट क्षेत्रको रुपमा रहेको सो क्षेत्रमा चीनबाट सडक बाटो आएपछि स्थानीयवासी खुसीले शुक्रबार रातभर नाचगानसहित जाग्राम नै बसेका थिए ।

टिपतालादेखि उक्त बस्तीसम्मको २१ किलोमिटर लामो सडक निर्माणकार्यमा तीन करोड रुपैयाँभन्दा बढी खर्च भएको छ । राज्यको भन्दा दुई तिहाइ बढी बालुङ समाजको लगानी रहेको उपभोक्ता समितिका अध्यक्ष छेतेन बालुङले जानकारी दिए। उनका अनुसार दुई करोड ५० लाख  रुपैयाँ बालुङ समाजले संकलन गरेको थियो ।

यस्तै सांसद विकास कोष र साविकको गाविस समेतको गरी ५३ लाख रुपैयाँ छ । ओलाङचुंगोला जन्मिएर देश तथा विदेशमा बसोवास गर्दै आएका बालुङहरुले सडक निर्माणका लागि सहयोग गरेका हुन् । उपभोक्ता समितिले सडक निर्माणको जिम्मा चिनियाँ ठेकेदार कम्पनीलाई दिएको छ ।

यता २०६६ साल देखि सुरु भएको ताप्लेजुङ सदरमुकाम फुङ्लिङ हुँदै ओलाङचुंगोला जोड्ने सडक निर्माण कार्य भने फक्ताङ्लुङ गाँउपालिकाकको तापेथोकमा पुगेको छ । हाल सम्म ४१ किलोमिटर ट्रयाक खोलिएको छ भने बाँकी ३५ किलोमिटर ट्रयाक खुले ओलाङचुंगोलासँग सदरमुकाम फुङ्लिङ सडक सञ्जालले जोडिने छ ।

उत्तर दक्षिण लोकमार्ग आयोजना प्रमुख कुवेर नेपालीले यो सडक निर्माणका लागि सरकारले यो वर्ष ६० करोड रुपैँया विनियोजन गरेको र वहुवर्षीय ठेक्कामा लगाउने निर्णय भएको बताए। रासस

Share:

© 2017 Setopati Sanchar Pvt. Ltd.