पर्यटन, ऊर्जा, सडक सञ्जाल विस्तार प्राथमिकतामा


अन्नपूर्ण गाउँपालिकाले आर्थिक समृद्धि र विकासका लागि पर्यटनको विकास, ऊर्जा उत्पादन, सडक सञ्जाल विस्तारलगायत विषयलाई प्राथमिकतामा राखेको छ।

गाउँपालिकाको बजेट, नीति तथा कार्यक्रम शुक्रबार सार्वजनिक गर्दै गाउँपालिकाका अध्यक्ष युवराज कुँवरले आव २०७४/७५ का लागि  २८ करोड ६५ लाख रुपैयाँ रकम विनियोजन गरिएको बताए।

पूर्वाधार विकास गाउँपालिकाको प्राथमिकतामा रहेको बताउँदै अध्यक्ष कुँवरले गाउँपालिकामा सबै वडालाई छुने गरी चक्रपथ निर्माण, स्थानीय सडक सञ्जाल विस्तारका साथै ऊर्जा उत्पादनका योजना अघि बढाइने बताए।

‘गाउँपालिकाभित्र अपार जलस्रोतको सम्भावना छ,’ उनले भने, ‘जलस्रोतको उपयोगमार्फत उद्योग व्यवसाय सञ्चालन गर्न सक्ने गरी विद्युतीय ऊर्जा उत्पादन गर्न यस क्षेत्रका स्थानीयवासीको कम्तीमा एक घर दश शेयरको अवधारणा अघि बढाइने छ।’

विश्वको उत्कृष्ट अन्नपूर्ण पदमार्गको विकास गर्न आवश्यक रहेको बताउँदै उनले यसका लागि आवश्यक भौतिक पूर्वाधार तयार गरी विश्व बजारमा प्रचारप्रसार गरिने जानकारी दिए। पर्यटकीय दृष्टिले महत्वपूर्ण अन्नपूर्ण गाउँपालिकाभित्रका पर्यटकीयस्थलको पहिचान गरी तिनीहरूको विकास गर्ने बताउँदै उहाँले यहाँका पदमार्गको मर्मतसम्भारका साथै नयाँ पदमार्गको पहिचान र विकास गरिने जानकारी दिए।

गाउँपालिकाभित्रका अन्नपूर्ण आधार शिविर, घान्द्रुक, लान्द्रुक, उल्लेरी, अष्ट्रेलियाली शिविर, तालच्याउनी, मणिको डाँडा, काडे, नौडाँडा, पञ्चासेलगायत पर्यटकीयस्थलको विकास र प्रचारप्रसार गरिनेमा उनको जोड छ।

कास्कीका प्रजिअ तारानाथ अधिकारीले अन्नपूर्ण गाउँपालिका अपार सम्भावना बोकेको क्षेत्र भएको बताउँदै सम्भावनाको उजागर र विकास गर्न सके गाउँपालिकालाई समृद्धि र विकासको मार्गमा लैजान सकिने बताए।

नेपाली काँग्रेसका नेता एवम् पूर्व सांसद शुक्रराज शर्माले पर्यटन, ऊर्जालगायत क्षेत्रमा धेरै सम्भावना रहेर पनि तिनीहरूको उपयोग गर्न नसकिएको बताए। नेकपा एमालेका नेता एवं पूर्व जिविस सभापति पुण्य पौडेलले भौगोलिक, जैविक एवम् सांस्कृतिक रुपमा विविधतायुक्त अन्नपूर्ण गाउँपालिकाको विकासका लागि सबै पक्षको सहकार्य आवश्यक भएकामा जोड दिए।

कार्यक्रममा गाउँपालिका उपप्रमुख सगुन गुरुङ, काँग्रेसका क्षेत्रीय सभापति पोषनाथ शर्मा, नेकपा माओवादी केन्द्रका जिल्ला सदस्य पुण्य पौडेल, राप्रपाका पूर्वकेन्द्रीय सदस्य कुलबहादुर गुरुङ, दलित महिला जनप्रतिनिधि गौमाया नेपालीलगायतले विकासमा राजनीतिकरण गर्न नहुने बताउँदै सबैको सहकार्यमा गाउँपालिकालाई समृद्ध बनाउनुपर्नेमा जोड दिए। रासस

Share:

© 2017 Setopati Sanchar Pvt. Ltd.